തദ്ദേശ തെരഞ്ഞെടുപ്പിന് നാളുകള്‍ മാത്രം അവശേഷിക്കെ, ഇടതു മുന്നണി ഭരിക്കുന്ന ഏരൂര്‍ ഗ്രാമപഞ്ചായത്തില്‍ ഗുരുതരമായ ക്രമക്കേടുകള്‍ നടന്നതായി ആരോപണം. കോണ്‍ഗ്രസ് നേതാക്കളായ പഞ്ചായത്ത് കോര്‍ കമ്മിറ്റി ചെയര്‍മാന്‍ സി.ജെ. ഷോം, മണ്ഡലം പ്രസിഡന്റ് ഗീവര്‍ഗീസ്, യു.ഡി.എഫ്. ചെയര്‍മാന്‍ പത്തടി സുലൈമാന്‍ എന്നിവര്‍ ആരോപണവുമായി രംഗത്തെത്തിയത് വിവാദങ്ങള്‍ക്കു വഴിതെളിച്ചു.
കുടിവെള്ള ക്ഷാമം പരിഹരിക്കാന്‍ 100 കോടി രൂപ ചെലവഴിച്ചു നിര്‍മിക്കുന്ന ആയിരനെല്ലൂര്‍ കുടിവെള്ള പദ്ധതി നിര്‍മാണം തുടങ്ങി മൂന്നു വര്‍ഷമായിട്ടും നിര്‍മാണം ആരംഭിക്കാന്‍ ഭരണസമിതി യാതൊരു ശ്രമവും നടത്തിയിട്ടില്ല. ഓയില്‍ പാം ഫാക്ടറിയില്‍ ശുചിത്വ മിഷനും പഞ്ചായത്തും ചേര്‍ന്ന് 70 ലക്ഷം രൂപ ചെലവഴിച്ചു നിര്‍മിച്ച ബയോ ഗ്യാസ് പ്ലാന്റ് ഉദ്ഘാടനം നടത്തി അഞ്ച് മാസം കഴിഞ്ഞിട്ടും കമ്മിഷന്‍ ചെയ്ത് കൈമാറിയില്ല. ഓഫ് സീസണില്‍ പ്രതിദിനം പാം ഓയില്‍ ഉല്‍പാദനത്തിന് ശേഷം പുറന്തള്ളൂന്ന സ്ലഡ്ജിന്റെ അളവ് 56,000 ലിറ്ററാണ്. സീസണില്‍ ഇത് വര്‍ധിക്കും. എന്നാല്‍ ദിവസം 8000 ലിറ്റര്‍ സംസ്‌കരിക്കുന്നതിന് വേണ്ടിയാണ് 70 ലക്ഷം രൂപ ചെലവഴിച്ചിരിക്കുന്നത്.
പഞ്ചായത്ത് പ്രസിഡന്റിന്റെ വാര്‍ഡില്‍ 25 അടി പൊക്കമുള്ള കുന്നിടിച്ചു നിരത്തി അഞ്ചര ഏക്കര്‍ സ്ഥലത്ത് നിന്ന് മണ്ണ് നീക്കം ചെയ്ത് 85 സെന്റിന് മാത്രമാണ് പഞ്ചായത്തില്‍ റോയല്‍റ്റി ഫീസ് അടച്ച് പെര്‍മിറ്റ് എടുത്തതെന്നാണ് മറ്റൊരു ആരോപണം. ഭൂമാഫിയയും ഭരണ സമിതിയും തമ്മിലുള്ള അവിശുദ്ധ കൂട്ടുകെട്ടിലൂടെ അംഗന്‍വാടി നിര്‍മിക്കുന്നതിന് വസ്തു വാങ്ങി എം.എല്‍.എയുടെ ആസ്തി വികസന ഫണ്ടില്‍നിന്ന് 25 ലക്ഷം രൂപ വിനിയോഗിച്ച് സ്മാര്‍ട്ട് അംഗന്‍വാടി നിര്‍മിക്കുകയും ശേഷം ചുറ്റുമുള്ള മണ്ണു നീക്കം ചെയ്യുകയും ചെയ്തു. കുന്നിന്‍ മുകളില്‍ അംഗന്‍വാടി നിര്‍മിച്ചതിനാല്‍ സംരക്ഷണ ഭിത്തി കെട്ടണമെങ്കില്‍ ഇനിയും ലക്ഷങ്ങള്‍ ചെലവഴിക്കേണ്ടി വരും.
22 ലക്ഷം രൂപ ചെലവഴിച്ചു വാര്‍ഡുകളില്‍ മുട്ടക്കോഴികളെ വിതരണം ചെയ്തതില്‍ ക്രമക്കേടുണ്ടെന്നും ആരോപണമുണ്ട്. സൗന്ദര്യ വല്‍ക്കരണത്തിന്റെ ഭാഗമായി ചെടിയും ചെടിച്ചട്ടികളും വാങ്ങിയ പദ്ധതിയ്ക്ക് ടെന്‍ഡര്‍ ക്ഷണിച്ചപ്പോള്‍ മൂന്ന് കൊട്ടേഷനുകളും ഒരേ കൈയക്ഷരത്തില്‍ എഴുതിയതും തീയതിയും രേഖപ്പെടുത്താതെയാണെന്നും പ്രതിപക്ഷം ആരോപിക്കുന്നു.
പ്രാഥമികാരോഗ്യ കേന്ദ്രത്തില്‍ മരുന്നില്ലാതെ പാലിയേറ്റീവ് രോഗികള്‍ അടക്കമുള്ളവര്‍ ദുരിതമനുഭവിക്കുന്നു. ലബോറട്ടറിയുടെ പ്രവര്‍ത്തനം നിലച്ചിട്ടു മാസങ്ങളായി. ലൈഫ് ഭവന പദ്ധതി നടത്തിപ്പില്‍ ജില്ലയില്‍ ഏറ്റവും പിന്നോക്കം നില്‍ക്കുന്ന പഞ്ചായത്തില്‍ നിര്‍മ്മാണം പൂര്‍ത്തിയാക്കി ഒരു വര്‍ഷമായിട്ടും ഒരു ഗഡു മാത്രമാണ് ലഭിച്ചത്. പി.എം.എ.വൈ. ഭവന പദ്ധതിയില്‍ പഞ്ചായത്ത് വിഹിതം അടയ്ക്കാത്തതിനാല്‍ ഗുണഭോക്താക്കള്‍ക്ക് എഗ്രിമെന്റ് വെയ്ക്കാന്‍ കഴിഞ്ഞിട്ടില്ല.
