കേരള സ്റ്റോറി 2: ഗോസ് ബിയോണ്ട്’ എന്ന സിനിമയുടെ റിലീസ് തടഞ്ഞ ഹൈക്കോടതി സിംഗിൾ ബെഞ്ചിന്റെ ഉത്തരവ് ഡിവിഷൻ ബെഞ്ച് സ്റ്റേ ചെയ്തു. ചിത്രത്തിന് പ്രദർശനാനുമതി നൽകിക്കൊണ്ട് കോടതി ഉത്തരവ് പുറപ്പെടുവിച്ചു. സിംഗിൾ ബെഞ്ച് ഉത്തരവിനെതിരെ സിനിമയുടെ നിർമ്മാതാക്കൾ സമർപ്പിച്ച അപ്പീൽ പരിഗണിച്ചാണ് ഡിവിഷൻ ബെഞ്ചിന്റെ ഈ നടപടി. ഇതോടെ ചിത്രത്തിന്റെ റിലീസിനുണ്ടായിരുന്ന നിയമതടസ്സങ്ങൾ താൽക്കാലികമായി നീങ്ങിയിരിക്കുകയാണ്.
കേരളത്തിന്റെ സാമൂഹിക കെട്ടുറപ്പിനെയും മതസൗഹാർദ്ദത്തെയും തകർക്കാൻ ലക്ഷ്യമിട്ടാണ് സിനിമ നിർമ്മിച്ചിരിക്കുന്നതെന്ന ആക്ഷേപം ശക്തമായിരുന്നു. നേരത്തെ, ചിത്രത്തിലെ വിദ്വേഷ പരാമർശങ്ങൾ ചൂണ്ടിക്കാട്ടി സിംഗിൾ ബെഞ്ച് റിലീസ് തടയുകയും സെൻസർ ബോർഡ് സിനിമ വീണ്ടും കാണണമെന്ന് നിർദ്ദേശിക്കുകയും ചെയ്തിരുന്നു. ഈ വിധി വന്നതോടെ മുഖ്യമന്ത്രി പിണറായി വിജയൻ ഉൾപ്പെടെയുള്ളവർ കോടതി തീരുമാനത്തെ സ്വാഗതം ചെയ്ത് രംഗത്തെത്തിയിരുന്നു. എന്നാൽ, ഡിവിഷൻ ബെഞ്ചിന്റെ പുതിയ ഉത്തരവ് നിർമ്മാതാക്കൾക്ക് വലിയ ആശ്വാസമാണ് നൽകുന്നത്. സിനിമയുടെ പ്രദർശനവുമായി ബന്ധപ്പെട്ട തുടർ നടപടികൾ വരും ദിവസങ്ങളിൽ കൂടുതൽ വ്യക്തമാകും.
