ശബരിമല മണ്ഡല കാലത്തിന് ആവശ്യമായ മുന്നൊരുക്കങ്ങൾ നടത്താത്തതിനെതിരെ തിരുവിതാംകൂര്‍ ദേവസ്വം ബോര്‍ഡിനെ രൂക്ഷമായി വിമര്‍ശിച്ച് ഹൈക്കോടതി. തിരക്ക് നിയന്ത്രിക്കാൻ ശാസ്ത്രീയമായ മാർഗങ്ങൾ ഉണ്ടാകണമെന്ന് കോടതി നിർദേശിച്ചു. ആറ് മാസം മുമ്പെങ്കിലും തീർത്ഥാടനം സംബന്ധിച്ചുളള ഒരുക്കങ്ങൾ നടത്തേണ്ടതായിരുന്നില്ലേയെന്നും ഹൈക്കോടതി ചോദിച്ചു.
ഉൾക്കൊള്ളാൻ കഴിയില്ലെങ്കിൽ എന്തിനാണ് ഇത്രയുമധികം ആളുകളെ പ്രവേശിപ്പിക്കുന്നതെന്ന് ചോദിച്ച കോടതി ഇത്ര വലിയ തിരക്കുമൂലം അപകടങ്ങളുണ്ടാകാമെന്ന് നിരീക്ഷിച്ചു. ഈ വർഷത്തെ തീർത്ഥാടന കാലം നവംബർ 16 നാണ് തുടങ്ങിയത്. ഇന്നലെ ഉണ്ടായ അസാധാരണമായ തിരക്കിൽ അപകടം ഉണ്ടായേക്കാമെന്ന ഭീതി ഉയർത്തിയിരുന്നു. തുടർന്നാണ് ഹൈക്കോടതിയുടെ വിമർശനം.
വരുന്നവരെ എല്ലാവരെയും തിരക്കി കയറ്റിവിടുന്നത് തെറ്റായ സമീപനമാണ്. അങ്ങനെ തിക്കി തിരക്കി ആളുകളെ കയറ്റിയിട്ട് എന്താണ് കാര്യമെന്നും ഹൈക്കോടതി ചോദിച്ചു. ജസ്റ്റിസ് എ രാജാ വിജയരാഘവൻ, കെ വി ജയകുമാർ എന്നിവരടങ്ങുന്ന ദേവസ്വം ബെഞ്ചാണ് വിമർശിച്ചത്.
ഓരോ സെക്ടറിലും എത്ര വലിപ്പം ഉണ്ടെന്ന് ചോദിച്ച കോടതി സ്ഥലപരിമിതിയുള്ളതിനാൽ അതിനസരിച്ചേ ഭക്തരെ കയറ്റാൻ പാടുള്ളുവെന്നും ആവശ്യപ്പെട്ടു. ശബരിമലയിൽ എത്ര പേരെ പരമാവധി ഉൾക്കൊള്ളാൻ കഴിയുമെന്ന് ദേവസ്വം ബോർഡിനോട് ഹൈക്കോടതി ചോദിച്ചു. ഓരോ സ്ഥലത്തും ഒരേ സമയം എത്ര പേരെ ഉൾക്കൊള്ളാൻ കഴിയുമെന്ന് തീരുമാനിക്കണം. ഇതിനായി ഒരു വിദഗ്ധ സംഘത്തെ രൂപപ്പെടുത്തണം.
ഇത് സാധാരണ ഉത്സവം നടത്തുന്ന രീതിയിൽ പറ്റില്ല. ശബരിമലയിൽ എത്തുന്നവരെ ശ്വാസം മുട്ടി മരിക്കാന്‍ അനുവദിക്കാനാവില്ലെന്നും അവർ ഭക്തരാണെന്നും കോടതി നീരീക്ഷിച്ചു. ഇത്രയും അധികം ആളുകൾ വരുന്നത് കണക്കിലെടുത്ത് വേണ്ട രീതിയിൽ ഏകോപനം ഉണ്ടായില്ലെന്നും ഹൈക്കോടതി വിമർശിച്ചു.
അതേസമയം, തിരക്ക് നിയന്ത്രണ വിധേയമാണെന്ന് ദേവസ്വം ബോര്‍ഡ് പ്രസിഡന്റ് കെ ജയകുമാർ മാധ്യമങ്ങളോട് പറഞ്ഞു. ഏകോപനത്തിൽ പ്രശ്‌നം ഉണ്ടായില്ലെന്നും ഇത്രയധികം ആളുകൾ വരുമെന്ന് കരുതിയില്ലെന്നും ജയകുമാർ പറഞ്ഞു.
