കേരളത്തിലെ തദ്ദേശ സ്ഥാപനങ്ങളിലേക്കുള്ള തിരഞ്ഞെടുപ്പ് തീയതി സംസ്ഥാന തിരഞ്ഞെടുപ്പ് കമ്മീഷൻ പ്രഖ്യാപിച്ചു. സംസ്ഥാനത്ത് രണ്ട് ഘട്ടങ്ങളിലായിട്ടായിരിക്കും വോട്ടെടുപ്പ് നടക്കുക, ഒന്നാം ഘട്ട വോട്ടെടുപ്പ് ഡിസംബർ 9 നും രണ്ടാം ഘട്ട വോട്ടെടുപ്പ് ഡിസംബർ 11 നും നടക്കും. ഡിസംബർ 13 നാണ് വോട്ടെണ്ണൽ.
നവംബർ 14 ന് തിരഞ്ഞെടുപ്പ് വിജ്ഞാപനമിറങ്ങും. നാമനിർദേശ പത്രിക നൽകാനുള്ള അവസാന തീയതി നവംബർ 21 നാണ്. 14 ജില്ലകളെ രണ്ട് ഘട്ടങ്ങളിലായി തിരിച്ച്‌ നടത്തുന്ന തിരഞ്ഞെടുപ്പിൽ ഡിസംബർ 9 ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിൽ വോട്ടെടുപ്പ് നടക്കും. രണ്ടാം ഘട്ടത്തിൽ തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളാണ് പോളിങ് ബൂത്തിലേക്ക് പോവുക. രാവിലെ ഏഴ് മണി മുതൽ വൈകിട്ട് ആറ് മണി വരെയായിരിക്കും പോളിംഗ് സമയം.
പെരുമാറ്റച്ചട്ടം നിലവിൽ വന്നു
തിരഞ്ഞെടുപ്പ് തീയതി പ്രഖ്യാപിച്ചതോടെ സംസ്ഥാനത്ത് മാതൃകാ പെരുമാറ്റച്ചട്ടം നിലവിൽ വന്നു. ജാതിയുടെയോ മതത്തിൻ്റെയോ പേരിൽ വോട്ട് ചോദിക്കരുത്. ഔദ്യോഗിക സ്ഥാനങ്ങളോ സ്ഥാനചിഹ്നങ്ങളോ പ്രചാരണത്തിനായി ഉപയോഗിക്കരുതെന്നും സംസ്ഥാന തിരഞ്ഞെടുപ്പ് കമ്മീഷൻ വാർത്താ സമ്മേളനത്തിൽ പറഞ്ഞു. പ്രചാരണ സമയത്ത് രാത്രി 10 മണിക്കും രാവിലെ 6 മണിക്കും ഇടയിൽ ഉച്ചഭാഷിണി (loudspeaker) ഉപയോഗിക്കാൻ പാടില്ല.ഹരിത ചട്ടം (Green Protocol) നിർബന്ധമായും പാലിച്ചായിരിക്കണം പ്രചാരണം നടത്തേണ്ടത്.
23,576 വാർഡുകൾ
മട്ടന്നൂർ നഗരസഭ ഒഴികെയുള്ള 1199 തദ്ദേശ സ്ഥാപനങ്ങളിലേക്കാണ് തിരഞ്ഞെടുപ്പ് നടക്കുന്നത്. ആകെ വാർഡുകൾ: 23,576 ഉം ആകെ പോളിംഗ് സ്റ്റേഷനുകൾ: 33,746 മാണ്. 70,000 പോലീസുകാരെ സുരക്ഷയ്ക്കായി വിന്യസിക്കും. പ്രശ്നബാധിത ബൂത്തുകളിൽ അധിക സുരക്ഷ ഏർപ്പെടുത്തുകയും വെബ് കാസ്റ്റിംഗ് ഏർപ്പെടുത്തുകയും ചെയ്യും.
നിലവിലെ ഭരണസമിതി
നിലവിൽ ത്രിതല പഞ്ചായത്ത് ഭരണസമിതികളിൽ ഇടതുമുന്നണിക്കാണ് മുൻതൂക്കം. കോർപ്പറേഷനുകൾ ആറിൽ അഞ്ചിടത്തും എൽഡിഎഫാണ് ഭരിക്കുന്നത്. കണ്ണൂരിൽ യുഡിഎഫ് ഭരണമാണ്. ജില്ലാ പഞ്ചായത്തുകളിൽ 14-ൽ 11 ഇടത്തും എൽഡിഎഫും എറണാകുളം, വയനാട്, മലപ്പുറം എന്നിവിടങ്ങളിൽ യുഡിഎഫുമാണ് ഭരിക്കുന്നത്. ഗ്രാമ, ബ്ലോക്ക് പഞ്ചായത്തുകളിലും ഭൂരിപക്ഷം എൽഡിഎഫിനാണ്.
