തദ്ദേശ തിരഞ്ഞെടുപ്പിനുള്ള വോട്ടർ പട്ടികയിൽ നിന്ന് പേര് നീക്കം ചെയ്തതെന്ന് കോൺഗ്രസ് ആരോപിച്ച സംവിധായകൻ വിഎം വിനുവിന് 2020 ലും വോട്ടില്ലായിരുന്നുവെന്ന വിവരം പുറത്ത്. കോഴിക്കോട് കോർപറേഷനിൽ കോൺഗ്രസിന്റെ മേയർ സ്ഥാനാർത്ഥിയായിട്ടാണ് വിനു മത്സരിക്കാനിറങ്ങിയത്.
ഇതോടെ വിനുവിന്റെ പേര് പട്ടികയിൽ നിന്നും വെട്ടിയതാണെന്ന കോൺഗ്രസിന്റെ വാദത്തിനാണ് തിരിച്ചടിയേറ്റത്. വിനുവിനെ സ്ഥാനാര്‍ത്ഥിയായി പ്രഖ്യാപിച്ച ശേഷം പേര് നീക്കം ചെയ്തതാണെന്ന ആരോപണമാണ് കോണ്‍ഗ്രസ് ഉയര്‍ത്തിയിരുന്നത്. 2020 ലെ തിരഞ്ഞെടുപ്പിൽ മലാപറമ്പ് ഡിവിഷനിൽ വോട്ട് ചെയ്തുവെന്നാണ് വിനു ഇന്നലെ പറഞ്ഞത്. എന്നാൽ മലാപറമ്പ് ഡിവിഷനിൽ കഴിഞ്ഞ തദ്ദേശ തിരഞ്ഞെടുപ്പിലെ വോട്ടര്‍ പട്ടികയിലും വിനുവിന്റെ പേര് ഉൾപ്പെട്ടിരുന്നില്ലെന്നാണ് വിവരം.
ഇതേ തുടർന്ന് കോൺഗ്രസ് നേതാക്കൾ കോഴിക്കോട് ഡിസിസി ഓഫീസിൽ അടിയന്തിര യോഗം ചേർന്നു. നിലവിലത്തെ സാഹചര്യത്തിൽ വിനുവിന് പകരക്കാരനെ കണ്ടെത്തേണ്ടി വരും. യോഗത്തിന് ശേഷം ഡിസിസി പ്രസിഡന്റ് കെ പ്രവീൺ കുമാറും വി എം വിനുവും മാധ്യമങ്ങളോട് സംസാരിച്ചു. 2020 ലെ തിരഞ്ഞെടുപ്പിൽ വിനുവിന് വോട്ട് ഉണ്ടായിരുന്നില്ല എന്ന വാദം അവർ തള്ളി. “കൃത്രിമം നടന്നതായി സംശയിക്കുന്നു. തിരഞ്ഞെടുപ്പ് കമ്മീഷന്റെ സൈറ്റിൽ പോലും 2020 ലെ വോട്ടർ പട്ടിക കാണാനില്ല. ഇതിൽ ഗൂഢാലോചന നടന്നിട്ടുണ്ട്. മുൻ വോട്ടർ പട്ടിക പരിശോധിക്കാൻ പോലും കഴിയുന്നില്ല. 2020 ൽ വിഎം വിനു മലാപറമ്പിൽ വോട്ട് ചെയ്തിട്ടുണ്ട്,” പ്രവീൺ കുമാർ പറഞ്ഞു.
ഞാനും വീടും ഭൂമിക്ക് അടിയിലേക്ക് താഴ്ന്നു പോയോ എന്നായിരുന്നു വിഎം വിനുവിന്റെ പ്രതികരണം. പേര് ആരോ മനഃപ്പൂർവം നീക്കം ചെയ്തതാണ്. 2020 ൽ വോട്ട് ചെയ്തിട്ടുണ്ടെന്നും വിനു ആവർത്തിച്ചു.
