കേന്ദ്രസർക്കാർ പാസാക്കിയ തൊഴിലാളി വിരുദ്ധ ലേബര്‍ കോഡിനെതിരെ രാജ്യവ്യാപകമായി പ്രതിഷേധങ്ങൾ ഉയരുന്നതിനിടെ കരട് വിജ്ഞാപനം കേരളത്തിലും 2021-ൽ ഇറങ്ങിയതായി രേഖകൾ. വേതനം, സാമൂഹിക സുരക്ഷാ കോഡ് എന്നിവ സംബന്ധിച്ച കരട് വിജ്ഞാപനം അന്ന് തൊഴിൽ മന്ത്രിയുടെ പോലും അറിവില്ലാതെയാണ് പുറത്തിറങ്ങിയതെന്നാണ് വിവരം.
സംഭവം ശ്രദ്ധയിൽപ്പെട്ടിട്ടില്ലെന്നും പരിശോധിക്കുമെന്നും തൊഴിൽ മന്ത്രി വി. ശിവൻകുട്ടി പ്രതികരിച്ചു. ഉദ്യോഗസ്ഥതലത്തിൽ വന്ന നടപടിക്രമം മാത്രമാണിതെന്നും, ഇതുമായി മുന്നോട്ട് പോകാൻ സർക്കാർ ഉദ്ദേശിക്കുന്നില്ലെന്നും മന്ത്രി വ്യക്തമാക്കി. ലേബർ കോഡിന്റെ വിഷയത്തിൽ കേരളത്തിന് ഉറച്ച നിലപാടാണുള്ളതെന്നും, കേന്ദ്രം ഏകപക്ഷീയമായാണ് ഇത് നടപ്പാക്കാൻ ശ്രമിക്കുന്നതെന്നും തൊഴിൽ മന്ത്രിമാരുടെ യോഗത്തിൽ താൻ എതിർപ്പ് അറിയിച്ചിരുന്നുവെന്നും ശിവൻകുട്ടി കൂട്ടിച്ചേർത്തു.
‘കേരള കോഡ് ഓൺ വേജസ് റൂൾസ് 2021’ എന്ന പേരിലാണ് 2021 ഡിസംബർ 14-ന് ഈ കരടുചട്ടം വിജ്ഞാപനം ചെയ്തത്. ട്രേഡ് യൂണിയനുകളുടെ ശക്തമായ പ്രതിഷേധം കണക്കിലെടുത്ത്, ഈ കരട് ചട്ടങ്ങൾ അന്തിമ വിജ്ഞാപനത്തിലേക്ക് കടന്നില്ലെന്നാണ് റിപ്പോർട്ടുകൾ പറയുന്നത്.
തൊഴിലാളികളുടെ വേതനവുമായി ബന്ധപ്പെട്ട് കേരളം മുമ്പ് പാസാക്കിയ എട്ട് ചട്ടങ്ങൾക്ക് പകരമായാണ് ഈ പുതിയ കോഡ് കൊണ്ടുവരാൻ ശ്രമം നടന്നത്. 1958-ലെ കേരള മിനിമം വേജസ് ചട്ടവും വേതനം നൽകലുമായി ബന്ധപ്പെട്ട മറ്റ് ഏഴ് ചട്ടങ്ങളുമാണ് പുതിയ കരട് ചട്ടത്തിൽ ഒഴിവാക്കിയത്. 10 അധ്യായങ്ങളിലായി 55 പാരഗ്രാഫുകളുള്ള ഈ കരടിന്മേൽ ആക്ഷേപം അറിയിക്കാൻ 45 ദിവസത്തെ സമയവും അന്ന് അനുവദിച്ചിരുന്നു.
അതേസമയം, തൊഴിലാളികളുടെ അവകാശങ്ങൾ തകർത്തു കൊണ്ട് രാജ്യത്ത് ‘ജംഗിൾ രാജ്’ നടപ്പിലാക്കാനാണ് കേന്ദ്രം ശ്രമിക്കുന്നതെന്നായിരുന്നു സിപിഎം പൊളിറ്റ്ബ്യൂറോ കഴിഞ്ഞ ദിവസം പ്രസ്താവിച്ചത്. ഈ വിവാദ വിഷയത്തിൽ തൊഴിൽ മന്ത്രിയുമായി ചർച്ച നടത്തുമെന്ന് എഐടിയുസിയും അറിയിച്ചിട്ടുണ്ട്.
ലേബർ കോഡിനെതിരെ ഇന്ന് വിവിധ തൊഴിലാളി സംഘടനകളുടെ നേതൃത്വത്തിൽ രാജ്യ വ്യാപക പ്രതിഷേധം നടന്നു.
