മാതൃകാപരമായ പെരുമാറ്റത്തിലൂടെ യാത്രക്കാരുടെ പ്രശംസ പിടിച്ച് പറ്റിയ വനിതാ കണ്ടക്ടറെ സ്വന്തം ഓഫീസിൽ വച്ച് അഭിനന്ദിച്ച് മന്ത്രി കെ ബി ഗണേഷ് കുമാർ. കെ. എസ്. ആർ. ടി.സി. കൊട്ടാരക്കര ഡിപ്പോയിലെ കണ്ടക്ടർ കെ. രേഖയാണ് ആ കണ്ടക്ടർ.
ഇങ്ങനെ ആകണം കെ. എസ്. ആർ. ടി.സി. യുടെ ജീവനക്കാരെന്ന് മന്ത്രി പറഞ്ഞു . ഈ കണ്ടക്ടറുടെ യാത്രക്കാരോടുള്ള പെരുമാറ്റത്തെ കുറിച്ചും ജോലിയോടുള്ള ആത്മാർത്ഥതയെ കുറിച്ചും നിരവധി പേരാണ് എന്നെയും എന്‍റെ ഓഫീസിനെയും വിളിച്ചു അറിയിച്ചത്. മികച്ച പ്രവർത്തനം കാഴ്ചവയ്ക്കുന്ന ജീവനക്കാരെ മന്ത്രിയുടെ ഓഫീസിൽ വച്ച് അഭിനന്ദിക്കുമെന്ന് കഴിഞ്ഞ ട്രാൻസ്പോ എക്പോ യുടെ സമയത്ത് തീരുമാനപ്പെടുത്തിരുന്നു. അതിന്‍റെ തുടർച്ചയായി ആ കണ്ടക്ടർ രേഖയെ അഭിനന്ദിച്ചു .ഇനിയും മികച്ച പ്രവർത്തനം കാഴ്ചവയ്ക്കുന്ന ജീവനക്കാരെ നേരിട്ട് അഭിനന്ദിക്കുമെന്ന് മന്ത്രി ഫേസ്ബുക്ക് പോസ്റ്റിൽ കുറിച്ചു.
രേഖയുടെ തൊഴിൽ മികവും പെരുമാറ്റവും മനസ്സിലാക്കിയ യാത്രക്കാരൻ ദിലീപ് വിശ്വനാഥൻ നവംബർ 22ന് നാണ് അവരെക്കുറിച്ച് ഫേസ്ബുക്കിൽ കുറിച്ചത്. “ഇന്നു വൈകിട്ട് കൊല്ലം ചിന്നക്കടയിൽ നിന്നും വീട്ടിലേക്ക് പോവാൻ ഒരു കെ എസ് ആർ ടി സി ബസ്സിൽ കയറി. ഒരുപാട് സീറ്റുകൾ ഒഴിഞ്ഞു കിടന്നത് കൊണ്ട് ആകെപ്പാടെ ഒരു സന്തോഷത്തിൽ ആണ് കയറി ഇരുന്നത്. പക്ഷേ സന്തോഷം ഒക്കെ ഒരു നിമിഷം കൊണ്ട് തരിപ്പണമാക്കിക്കളഞ്ഞു കണ്ടക്ടർ. കാർഡ് കൊടുത്തു, ഇറങ്ങേണ്ട സ്റ്റോപ്പ് പറഞ്ഞപ്പോൾ അവർ പറഞ്ഞത് കാർഡിൽ പൈസ ഇല്ലെന്നാണു. 500 രൂപയ്ക്ക് ചാർജ്ജ് ചെയ്തിട്ട് അധികം യാത്ര ചെയ്തിട്ടില്ലാത്തത് കൊണ്ട് അത് വിശ്വസനീയമായി തോന്നിയില്ല. പക്ഷേ, ഉടനെ തന്നെ അവർ ‘ശരിയായി, ഒന്നു കൂടി ശ്രമിച്ചപ്പോൾ വർക്ക് ആയി’ എന്നു പറഞ്ഞ് കാർഡും ടിക്കറ്റും തന്നു,” ദിലീപിന്റെ പോസ്റ്റിൽ പറയുന്നു.
“പിന്നെ ഞാൻ കണ്ടക്ടറെ തന്നെ ഒന്നും ശ്രദ്ധിച്ചപ്പോൾ അവരുടെ യാത്രക്കാരോടുള്ള പെരുമാറ്റത്തിൽ ഒരു കൗതുകം തോന്നി. ഒരു യുവതിയാണു കണ്ടക്ടർ. എല്ലാവരേയും അണ്ണാ, ചേച്ചി, മോളേ, ഡാ എന്നൊക്കെ വിളിച്ച് അവർ ബസിൽ ഓടി നടക്കുന്നു. ഓരോരുത്തരെ വിളിച്ച് ഒഴിയുന്ന സീറ്റുകളിൽ ഇരുത്തുന്നു, ഒഴിയാൻ പോകുന്ന സീറ്റുകൾ ഏതൊക്കെ എന്നു ദൂരെ ഇറങ്ങേണ്ടവരോട് പറയുന്നു, രണ്ടിടത്തായിപ്പോയ അമ്മയേയും മകനേയും ഒരിടത്ത് സീറ്റ് അഡ്ജസ്റ്റ് ചെയ്തു കൊടുക്കുന്നു. ആകപ്പാടെ ബസിൽ ഒരു കുടുംബ സംഗമത്തിനു എത്തിപ്പെട്ട ഫീൽ,” പോസ്റ്റ് ഇങ്ങനെ തുടരുന്നു.
ഇന്നാണ് ഫലകം നൽകി മന്ത്രി രേഖയെ അഭിനന്ദിച്ചത്.
