‘ധർമേന്ദ്രയുടെ മരണം തനിക്ക് വിവരിക്കാനാവാത്ത നഷ്ടമാണെന്ന് ഭാര്യ ഹേമ മാലിനി. അദ്ദേഹത്തോടൊപ്പമുള്ള അഞ്ച് പതിറ്റാണ്ടിലേറെ നീണ്ട ദാമ്പത്യം വലിയൊരു അനുഗ്രഹമായി കാണുന്നുവെന്നും ബോളിവുഡിന്റെ സ്വപ്‍ന സുന്ദരി പറഞ്ഞു. തിങ്കളാഴ്ചയാണ് ഇന്ത്യൻ സിനിമയുടെ ‘ഹീ-മാൻ’ എന്നറിയപ്പെടുന്ന ധർമേന്ദ്ര വിടവാങ്ങിയത്.
‘വെള്ളിത്തിരയിലെ കരുത്തുറ്റ കഥാപാത്രങ്ങൾക്കപ്പുറം, ഉള്ളിൽ കവിത സൂക്ഷിച്ചിരുന്ന സൗമ്യനായ ഒരു മനുഷ്യനായിരുന്നു അദ്ദേഹം,’ ഈ സമയത്ത് തങ്ങളുടെ കുടുംബത്തിന്റെ സ്വകാര്യത മാനിക്കണമെന്ന് അഭ്യർത്ഥിച്ച് കൊണ്ട് ഹേമ മാലിനി പറഞ്ഞു.
ആരോഗ്യപ്രശ്നങ്ങളെത്തുടർന്ന് മുംബൈയിലെ ബ്രീച്ച് കാൻഡി ആശുപത്രിയിൽ ചികിത്സയിലായിരുന്നു 89 കാരനായ ധർമേന്ദ്ര. ആശുപത്രി വിട്ട് വീട്ടിൽ വിശ്രമത്തിലിരിക്കവെയാണ് അന്ത്യം സംഭവിച്ചത്. ജുഹുവിലെ പവൻ ഹാൻസ് ശ്മശാനത്തിൽ നടന്ന സംസ്കാര ചടങ്ങിൽ ഹേമ മാലിനി, മക്കളായ ഇഷ ഡിയോൾ, അഹാന ഡിയോൾ, ആദ്യഭാര്യയിലെ മക്കളായ സണ്ണി ഡിയോൾ, ബോബി ഡിയോൾ എന്നിവർക്ക് പുറമേ ബോളിവുഡിലെ പ്രമുഖ താരങ്ങളും പങ്കെടുത്തിരുന്നു.
‘ധരം ജി… എനിക്ക് അദ്ദേഹം പലതുമായിരുന്നു. സ്നേഹനിധിയായ ഭർത്താവ്, ഇഷയുടെയും അഹാനയുടെയും വാത്സല്യനിധിയായ പിതാവ്, സുഹൃത്ത്, തത്വ ചിന്തകൻ, വഴികാട്ടി, കവി, ഏത് ആവശ്യഘട്ടത്തിലും എനിക്ക് ഓടിയെത്താവുന്ന ഒരാൾ – എനിക്ക് അദ്ദേഹം എല്ലാമായിരുന്നു! സന്തോഷങ്ങളിലും സങ്കടങ്ങളിലും അദ്ദേഹം എപ്പോഴും എനിക്കൊപ്പം ഉണ്ടായിരുന്നു. ലളിതവും സൗഹൃദപരവുമായ പെരുമാറ്റത്തിലൂടെയും, എല്ലാവരോടും സ്നേഹവും കരുതലും കാണിച്ചുകൊണ്ടും അദ്ദേഹം എന്റെ കുടുംബാംഗങ്ങൾക്കെല്ലാം പ്രിയപ്പെട്ടവനായി,” ഹേമമാലിനി ‘എക്സി’ൽ കുറിച്ചു.
ഒരു പൊതു വ്യക്തിത്വം എന്ന നിലയിൽ നോക്കുമ്പോൾ, അദ്ദേഹത്തിന്റെ പ്രതിഭയും, പ്രശസ്തിയുടെ ഉന്നതിയിലും അദ്ദേഹം കാത്തുസൂക്ഷിച്ച വിനയവും, അദ്ദേഹത്തിന് ലഭിച്ച സാർവത്രികമായ സ്വീകാര്യതയും, മറ്റ് ഇതിഹാസ താരങ്ങളിൽ നിന്ന് അദ്ദേഹത്തെ വേറിട്ടുനിർത്തിയതായും ഹേമമാലിനി ഓർമ്മിപ്പിക്കുന്നു. തനിക്കുണ്ടായ വ്യക്തിപരമായ നഷ്ടം വാക്കുകൾക്ക് അതീതമാണ്. അദ്ദേഹത്തിന്റെ വിയോഗം സൃഷ്ടിച്ച ശൂന്യത എന്നും നിലനിൽക്കുമെന്നും അവർ കുറിച്ചു.
നൂറുകണക്കിന് ചിത്രങ്ങളിലൂടെ ഇന്ത്യൻ സിനിമാലോകത്ത് തന്റേതായ ഇടം കണ്ടെത്തിയ ധർമേന്ദ്രയുടെ വിയോഗം സിനിമാലോകത്തിന് നികത്താനാവാത്ത നഷ്ടമാണ്. ഷോലെ, സീത ഔർ ഗീത, ധരം വീർ തുടങ്ങിയവയാണ് ധർമേന്ദ്രയുടെ അവിസ്മരണീയ ചിത്രങ്ങൾ.
