കോഴിക്കോട് കോർപറേഷനിലെ കോൺഗ്രസ് മേയർ സ്ഥാനാർത്ഥിയും സിനിമ സംവിധായകനുമായ വി എം വിനുവിന് തിരിച്ചടി. വോട്ടർ പട്ടികയിൽ പേര് ചേർക്കണമെന്ന് ആവശ്യപ്പെട്ട് വിനു സമർപ്പിച്ച ഹർജി ഹൈക്കോടതി തള്ളി. ഇതോടെ വിനുവിന് തദ്ദേശ സ്വയംഭരണ തിരഞ്ഞെടുപ്പിൽ മത്സരിക്കാൻ കഴിയില്ലെന്ന് ഉറപ്പായി.
വി എം വിനുവിന്റെ പേര് വോട്ടർ പട്ടികയിൽ ഉണ്ടായിരുന്നില്ല. ഈ സാഹചര്യത്തിലാണ് പട്ടികയിൽ പേര് ചേർക്കാനായി വിനു ഹൈക്കോടതിയെ സമീപിച്ചത്. എന്നാൽ, ഹർജി പരിഗണിച്ച ഹൈക്കോടതി വിനുവിന്റയെ ആവശ്യം നിരാകരിക്കുകയായിരുന്നു.
ഹർജി തള്ളിക്കൊണ്ട് ഹൈക്കോടതി നടത്തിയ നിരീക്ഷണം, വിനുവിനും കോൺഗ്രസിനും തിരിച്ചടിയായി. “ഒരു സെലിബ്രിറ്റിക്ക് പ്രത്യേക പരിഗണനയില്ല. വോട്ടർ പട്ടികയിൽ പേര് ഉണ്ടോയെന്ന് സ്ഥാനാർത്ഥിയാകുന്നതിന് മുമ്പ് പരിശോധിക്കേണ്ടതല്ലേ?,” ഹൈക്കോടതി ചോദിച്ചു.
നിയമപരമായ നടപടിക്രമങ്ങൾ കൃത്യമായി പാലിക്കാത്തതിനാൽ വിനുവിന്റെ പേര് വോട്ടർ പട്ടികയിൽ ചേർക്കാൻ കഴിയില്ലെന്ന് ചൂണ്ടിക്കാട്ടിയാണ് കോടതി ഹർജി തള്ളിയത്. ഈ സാഹചര്യത്തിൽ കോൺഗ്രസ് കോഴിക്കോട് കോർപറേഷനിൽ പുതിയ സ്ഥാനാർത്ഥിയെ കണ്ടെത്തേണ്ടി വരും.
2020 ൽ മലാപറമ്പ് ഡിവിഷനിൽ വോട്ട് ചെയ്‌തെന്നാണ് വിഎം വിനു അവകാശപ്പെട്ടിരുന്നത്. കോഴിക്കോട് ഡിസിസി പ്രസിഡന്റ് കെ പ്രവീൺ കുമാറും ഇതാവർത്തിച്ചിരുന്നു എന്നാൽ 2020 ലെ തിരഞ്ഞടുപ്പിലും വിനു വോട്ട് ചെയ്തിട്ടില്ലെന്ന വിവരം ഇന്നലെ പുറത്ത് വന്നു. ഇതോടെ പാർട്ടിയും വിനുവും വീണ്ടും പ്രതിരോധത്തിലായി. വിനുവിന്റെ പേര് വോട്ടർ പട്ടികയിൽ നിന്ന് വെട്ടിയതാണെന്ന വാദവും ഇതോടെ പൊളിഞ്ഞു.
തിരുവനന്തപുരം മുട്ടടയിൽ നിന്നും കോൺഗ്രസ് സ്ഥാനാർത്ഥിയാക്കിയ വൈഷ്ണ സുരേഷിന്റെ പേര് വോട്ടർ പട്ടികയിൽ നിന്നും തിരഞ്ഞെടുപ്പ് കമ്മീഷൻ നീക്കാൻ ചെയ്തിരുന്നു. ഇതുമായി ബന്ധപ്പെട്ട ഹർജിയിൽ, 20 നുള്ളിൽ തീരുമാനമെടുക്കണമെന്ന് ഹൈക്കോടതി തിങ്കളാഴ്‌ച നിർദ്ദേശിച്ചിരുന്നു.
വൈഷ്ണയുടെ കേസ് വ്യത്യസ്തമാണെന്നും ഹൈക്കോടതി പറഞ്ഞു. പ്രാഥമിക ലിസ്റ്റിൽ പേരുണ്ടായിരുന്നു. അവസാന നിമിഷമാണ് പേര് വെട്ടിയത്, അതുകൊണ്ടാണ് കോടതി ഇടപെട്ടത്. ഇവിടെ സ്ഥിതി വേറെയാണെന്നും ഹൈക്കോടതി കൂട്ടിച്ചേര്‍ത്തു.
