വോട്ടര്‍പട്ടിക തീവ്രപരിശോധന ജനങ്ങള്‍ക്കിടയില്‍ ഭീതിയും ആശങ്കയും സൃഷ്ടിച്ചിട്ടുണ്ടെന്നും അത് പരിഹരിക്കാന്‍ അധികൃതര്‍ തയ്യാറാവണമെന്നും കാന്തപുരം എ പി അബൂബക്കര്‍ മുസ്ലിയാര്‍. നിലവില്‍ എസ്.ഐ.ആര്‍ പൂര്‍ത്തിയായ ബിഹാറില്‍ ലക്ഷക്കണക്കിന് മനുഷ്യര്‍ വോട്ടര്‍പട്ടികയില്‍നിന്ന് പുറത്തായതും സുപ്രീംകോടതിയുടെ ഇടപെടല്‍ ഉണ്ടായതും നമ്മുടെ മുന്നിലുണ്ടെന്നും കാന്തപുരം പറഞ്ഞു.
വോട്ടര്‍പട്ടികയില്‍നിന്ന് പുറംതള്ളപ്പെട്ടവരില്‍ മഹാഭൂരിഭാഗവും ന്യൂനപക്ഷ വിഭാഗങ്ങളില്‍പെട്ടവരും ദരിദ്രസാഹചര്യത്തില്‍ ഉള്ളവരുമാണ്. സമാനമായി കേരളത്തിലും അര്‍ഹതപ്പെട്ടവര്‍ പട്ടികയില്‍നിന്ന് പുറത്തുപോകുമോയെന്ന ആശങ്കയുണ്ട്. എസ്.ഐ.ആറിന്റെ മറവില്‍ പൗരത്വപരിശോധനയാണ് യഥാര്‍ഥത്തില്‍ നടക്കുന്നതെന്ന ഭീതിയും നിലനില്‍ക്കുന്നു.
വോട്ടര്‍പട്ടിക കുറ്റമറ്റതാക്കാന്‍വേണ്ട പരിശോധന നടത്തുന്നതില്‍ ആര്‍ക്കും എതിര്‍പ്പില്ല. പക്ഷേ, അത്തരം നടപടികള്‍ സുതാര്യവും നീതിയുക്തവുമാവണം. തീവ്രപരിശോധനയ്ക്ക് സമര്‍പ്പികേണ്ട രേഖകള്‍ സംബന്ധിച്ച ചില മാനദണ്ഡങ്ങള്‍ അടിസ്ഥാന ജനവിഭാഗങ്ങളില്‍പെട്ട മനഷ്യര്‍ക്കും പുറം രാജ്യങ്ങളില്‍ ജോലിയെടുത്ത് ജീവിക്കുന്നവര്‍ക്കും പല തരത്തിലുള്ള സങ്കീര്‍ണതകള്‍ സൃഷ്ടിക്കുന്നുണ്ട്. ഈ സങ്കീര്‍ണതകളില്‍തട്ടി വോട്ടവകാശത്തോടൊപ്പം പൗരത്വംപോലും പ്രതിസന്ധിയിലാകുമോയെന്ന ഭീതിയും നിലനില്‍ക്കുന്നു. ഇക്കാര്യം പരിശോധിച്ച് ജനങ്ങള്‍ക്കിടയിലുണ്ടായിട്ടുള്ള ഭീതി പരിഹരിക്കാന്‍ അധികൃതര്‍ അടിയന്തര നടപടി കൈക്കൊള്ളണം.
തദ്ദേശ തിരഞ്ഞെടുപ്പിന്റെ സാഹചര്യത്തില്‍ തീവ്രപരിശോധന നീട്ടിവെക്കണമെന്ന കേരളത്തിന്റെ ആവശ്യം നിരസിച്ച സാഹചര്യത്തില്‍ വോട്ടര്‍പട്ടിക പരിശോധനയുടെ തുടക്കംമുതല്‍ സംസ്ഥാന സര്‍ക്കാര്‍ ജാഗ്രതയോടെ ഇടപെടുകയും അര്‍ഹതപ്പെട്ട ഒരാള്‍ പോലും വോട്ടര്‍പട്ടികയില്‍നിന്ന് പുറത്താവില്ലെന്ന് ഉറപ്പുവരുത്താനുള്ള നടപടികള്‍ സ്വീകരിക്കണം. പട്ടികയില്‍ ഉള്‍പ്പെടുന്നതിലും ആവശ്യമായ രേഖകള്‍ തയ്യാറാക്കി വെക്കുന്നതിലും എല്ലാവരും ശ്രദ്ധ പുലര്‍ത്തണം.
അറിവില്ലായ്മകൊണ്ടോ അശ്രദ്ധകൊണ്ടോ വോട്ടവകാശം നഷ്ടപ്പെടുന്ന സാഹചര്യമുണ്ടാകരുത്. രാഷ്ട്രീയ പാര്‍ട്ടികളും ഉദ്യോഗസ്ഥരും പൊതുപ്രവര്‍ത്തകരും സാമൂഹിക സംഘടനകളും മാധ്യമങ്ങളും ഈ വിഷയത്തില്‍ സാധാരണ ജനങ്ങളെ ബോധവത്കരിക്കാനും സഹായിക്കാനും മുന്നോട്ടുവരണമെന്നും കാന്തപുരം പറഞ്ഞു.
