ശബരിമല സ്വർണ്ണപ്പാളി വിഷയത്തിൽ പഴയ ദേവസ്വം ബോർഡ് പ്രസിഡൻ്റിനും പഴയ ദേവസ്വം കമ്മീഷണർക്കും വീഴ്ച്ച പറ്റിയെന്ന് സിപിഎം നേതാവ് പി ജയരാജൻ. ഉത്തരവാദപ്പെട്ട സ്ഥാനങ്ങളിൽ ഇരിക്കുന്നവർ ഇക്കാര്യത്തിൽ പുലർത്തിയ ‘അവധാനത ഇല്ലായ്മ’ നീതികരിക്കാൻ കഴിയുന്നതലെന്നും ജയരാജൻ തന്റെ ഫേയ്സ്ബുക്ക് പോസ്റ്റിൽ പറയുന്നു.
പദ്മകുമാറിന്റെ അറസ്റ്റും വസ്തുതയും എന്ന് പറഞ്ഞാണ് പോസ്റ്റ് തുടങ്ങുന്നത്. “ശബരിമല സ്വർണ്ണക്കേസിനും രണ്ട് ഭാഗങ്ങൾ ഉണ്ട്. സ്വർണ്ണം പൂശി നൽകാമെന്ന് ഏറ്റ് സ്പോൺസറെ പോലെ വന്ന് സ്വർണ്ണം മോഷ്ടിച്ച ഉണ്ണികൃഷ്ണൻ പോറ്റിയും സംഘവും. സ്വർണ്ണം പൂശാൻ വിട്ടു നൽകുമ്പോൾ ചട്ട പ്രകാരം പാലിക്കേണ്ട നടപടിക്രമങ്ങളിൽ വീഴ്ച്ച വരുത്തിയ ഉദ്യോഗസ്ഥ / ഭരണവിഭാഗം. സ്വർണ്ണം വിട്ടു നൽകുമ്പോഴും, ഫയലുകളിൽ രേഖപ്പെടുത്തലുകളിലും അലംഭാവം കാണിച്ച ഉദ്യോഗസ്ഥ സംഘം. ഇവരെ നയിക്കുന്നതിൽ ഭരണപരമായ വീഴ്ച്ച കൂടിയുണ്ട് എന്ന് തെളിഞ്ഞതിനാലാണ് പദ്മകുമാറിൻ്റെ അറസ്റ്റ് നടന്നിരിക്കുന്നത്,” ജയരാജൻ തന്റെ ഫെയ്സ്ബുക്ക് പോസ്റ്റിൽ പറയുന്നു.
ശബരിമല സ്വർണ്ണക്കൊള്ള കേസിൽ ഏറ്റവും പ്രധാനപ്പെട്ട അറസ്സ് ആണ് സിപിഎം നേതാവും മുൻ ദേവസ്വം ബോർഡ് പ്രസിഡന്റുമായ എ പത്മകുമാറിന്റേത്. പ്രത്യേക അന്വേഷണ സംഘം ഇന്നലെയാണ് പദ്‌മകുമാറിനെ അറസ്റ്റ് ചെയ്തത്. കവർച്ച പത്മകുമാറിന്റെ അറിവോടെ ആണെന്നാണ് അന്വേഷണ സംഘത്തിന്റെ കണ്ടെത്തൽ.
“ഫയലിൽ ചെമ്പ് പാളി എന്ന് ഉദ്യേഗസ്ഥർ രേഖപ്പെടുത്തിയത് ‘കറക്റ്റ്’ ചെയ്യുന്നതിൽ പഴയ ദേവസ്വം ബോർഡ് പ്രസിഡൻ്റിനും, പഴയ ദേവസ്വം കമ്മീഷണർക്കും വീഴ്ച്ച പറ്റി. ഇത് മോഷണത്തിലേക്ക് നയിച്ചു. ഉത്തരവാദപ്പെട്ട സ്ഥാനങ്ങളിൽ ഇരിക്കുന്നവർ ഇക്കാര്യത്തിൽ പുലർത്തിയ ‘അവധാനത ഇല്ലായ്മ’ നീതികരിക്കാൻ കഴിയുന്നതല്ല. അന്വേഷണം ആരംഭിക്കുമ്പോൾ തന്നെ എത്ര വലിയ ഉന്നതൻ ആണെങ്കിലും പിടിക്കപ്പെടും എന്ന് സർക്കാർ പറഞ്ഞിരുന്നു. ഒരാളെയും സംരക്ഷിക്കില്ല എന്നും സർക്കാർ വ്യക്തമാക്കിയിരുന്നു , ആ നയം തുടരും…,” എന്ന് പറഞ്ഞാണ് ജയരാജൻ തന്റെ ഫെയ്സ്ബുക്ക് പോസ്റ്റ് അവസാനിപ്പിക്കുന്നത്.
കേസിൽ അറസ്റ്റിലാകുന്ന രണ്ടാമത്തെ ദേവസ്വം ബോർഡ് പ്രസിഡന്റാണ് പദ്‌മകുമാർ. നേരത്തെ മുൻ ദേവസ്വം ബോർഡ് കമ്മിഷണറും പിന്നീട് പ്രസിഡന്റുമായ എൻ വാസുവും അറസ്റ്റിലായിരുന്നു.
