കൊടുവള്ളി നഗരസഭയിൽ വോട്ടർ പട്ടിക ക്രമക്കേട് നടന്നെന്ന് വ്യക്തമാക്കുന്ന നഗരസഭാ അസിസ്റ്റന്റ് സെക്രട്ടറിയുടെ കത്ത് പുറത്ത്. 37 വാർഡുകളിലും വോട്ട് മാറ്റിയതുമായി ബന്ധപ്പെട്ട രേഖകളോ നോട്ടീസോ നഗരസഭയിലില്ല എന്നാണ് കത്തിൽ പറയുന്നത്. വോട്ടർ പട്ടികയെച്ചൊല്ലി കൊടുവള്ളി നഗരസഭയില്‍ വിവാദം ചൂട് പിടിക്കുന്നതിനിടെയാണ് പട്ടികയിലെ ക്രമക്കേട് സ്ഥിരീകരിച്ച് നഗരസഭ അസിസ്റ്റന്റ് സെക്രട്ടറി നല്‍കിയ കത്ത് പുറത്ത് വന്നത്. വോട്ട് തള്ളിയതിന്‍റെയും വോട്ട് മാറ്റിയതിന്‍റെയും രേഖകൾ കാണാനില്ലെന്നും യാതൊരു നടപടിക്രമവും പാലിക്കാതെയാണ് വോട്ടർ പട്ടിക തയ്യാറാക്കിയതെന്നും അസിസ്റ്റന്റ് സെക്രട്ടറി നഗരസഭ ചെയര്‍മാന് നല്‍കിയ മറുപടിയില്‍ സമ്മതിച്ചു.
ഫോം 5,13,14 എന്നിവ നൽകിയ രേഖകളും വോട്ടർമാരെ മാറ്റിയതിന്റെ നോട്ടിസ് നൽകിയ രേഖകളും നഗരസഭയിൽ ഇല്ല. അസിസ്റ്റന്റ് സെക്രട്ടറിയുടെ കണ്ടെത്തൽ ഓഫീസിൽ നേരിട്ടെത്തി പരിശോധ നടത്തി എൽഎസ് ജി ഡി ഡെപ്യൂട്ടി ഡയറക്ടറും ശരിവെച്ചു.
തദ്ദേശ വോട്ടർപട്ടികയിലെ ക്രമക്കേട് ആരോപണത്തിന് പിന്നാലെ കൊടുവള്ളി നഗരസഭ സെക്രട്ടറി ജി.എസ്. മനോജിനെ മാറ്റണമെന്നാവശ്യപ്പെട്ട് തദ്ദേശ വകുപ്പ് സെക്രട്ടറിക്ക് തെരഞ്ഞെടുപ്പ് കമ്മീഷൻ നിർദേശം നൽകിയിട്ടുണ്ട്. വോട്ടർ പട്ടിക ക്രമക്കേട് പരാതിയിൽ ഉടൻ നടപടി എടുക്കാൻ ജില്ലാ കലക്ടർ നിർദേശിച്ചിട്ടും സെക്രട്ടറി ഓഫിസിൽ എത്തിയിരുന്നില്ല. ഇതേ തുടർന്നായിരുന്നു തെരഞ്ഞെടുപ്പ് കമ്മീഷന്‍റെ നടപടി. രണ്ടാഴ്ചയായി മനോജ് എവിടെയാണെന്ന് ആർക്കും അറിയില്ല. ഓഫീസില്‍ എത്താത്ത നഗരസഭ സെക്രട്ടറി വി.എസ് മനോജിനെതിരെ നടപടിയെടുക്കണമെന്ന് യുഡിഎഫും ആവശ്യപ്പെട്ടു.
വോട്ടര്‍പട്ടികയില്‍ നിന്ന് പേരു നീക്കം ചെയ്യപ്പെട്ടവര്‍ ജില്ലാ കലക്ടര്‍ക്ക് മുന്നില്‍ നേരിട്ടെത്തി വലിയ പ്രതിഷേധങ്ങൾ നടത്തിയിരുന്നു. കലക്ടറുടെ നിര്‍ദ്ദേശത്തെത്തുടര്‍ന്ന് തദ്ദേശ ഭരണ വകുപ്പ് ഡെപ്യൂട്ടി ഡയറക്ടര്‍ നഗരസഭ ഓഫീസിലെത്തി അന്വേഷണവും നടത്തി.
സെക്രട്ടറി വി.എസ് മനോജ് ഓഫീസിലെത്താത്ത സാഹചര്യത്തില്‍ അസിസ്റ്റന്റ് സിന്ധു ടി.പി നഗരസഭ ചെയര്‍മാന് നല്‍കിയ കത്തിലാണ്, നടന്ന ക്രമക്കേടുകള്‍ തുറന്ന് സമ്മതിക്കുന്നത്. വോട്ടർ പട്ടികയിൽ ഉൾപ്പെടുത്തുന്നതിനും തള്ളുന്നതിനുമായി നൽകിയ അപേക്ഷകളോ, വോട്ടർമാർക്ക് നൽകിയ നോട്ടീസുകളോ ഓഫീസിൽ കാണാനില്ലെന്ന് റിപ്പോർട്ടിൽ പറയുന്നു. വോട്ടുകൾ കൂട്ടമായി മറ്റൊരിടത്തേക്ക് മാറ്റുന്നതിന് പാലിക്കേണ്ട നിയമപരമായ നടപടിക്രമങ്ങൾ പാലിച്ചിട്ടില്ലെന്നും കത്തില്‍ പറയുന്നു. ഓഫീസിൽ പരിശോധന നടത്തിയ തദ്ദേശ സ്വംയ ഭരണ വകുപ്പ് ഡെപ്യൂട്ടി ഡയറക്ടർ ഇക്കാര്യങ്ങള്‍ ശരി വയ്ക്കുകയും ചെയ്യുന്നു. 1500ൽ അധികം വോട്ടുകൾ മാനദണ്ഡം പാലിക്കാതെ മറ്റു വാർഡുകളിലേക്ക് മാറ്റിയെന്നായിരുന്നു യുഡിഎഫ് പരാതി.
