രാഹുൽ മാങ്കൂട്ടത്തിൽ എംഎൽഎയ്ക്കെതിരായ ലൈംഗിക പീഡനക്കേസിലെ പരാതിക്കാരിയുടെ പേരുവിവരങ്ങൾ വെളിപ്പെടുത്തിയ കേസിൽ അറസ്റ്റിലായ രാഹുൽ ഈശ്വറിനെ പോലീസ് തെളിവെടുപ്പിനായി കൊണ്ടു പോയി. രാഹുലിനെ ഇന്ന് കോടതിയിൽ ഹാജരാക്കും.
അന്വേഷണത്തിന്റെ ഭാഗമായി രാഹുൽ ഈശ്വറിന്റെ മൊബൈൽ ഫോണും ലാപ്ടോപ്പും പോലീസ് കസ്റ്റഡിയിലെടുത്തിയിരുന്നു. ലാപ്ടോപ്പിൽ നിന്നാണ് അതിജീവിതയുടെ (Survivor) വിവരങ്ങൾ (Identity) അടങ്ങിയ വീഡിയോ അപ്ലോഡ് ചെയ്തതെന്നായിരുന്നു രാഹുൽ പോലീസിന് നൽകിയ മൊഴി. എന്നാൽ, വിശദമായ പരിശോധനയിൽ മൊബൈൽ ഫോണിലെ ഒരു ഫോൾഡറിൽ നിന്ന് അപ്ലോഡ് ചെയ്ത വീഡിയോ പോലീസ് കണ്ടെത്തി. തുടർന്നാണ് ഫോൺ പിടിച്ചെടുത്തത്.
അതിജീവിതയ്ക്കെതിരെ സൈബർ അധിക്ഷേപം നടത്തിയ കേസിൽ രാഹുൽ ഈശ്വറിനെ കൂടാതെ കെപിസിസി ജനറൽ സെക്രട്ടറി സന്ദീപ് വാര്യർ, മഹിളാ കോൺഗ്രസ് നേതാവ് രഞ്ജിത പുളിക്കൻ, അഡ്വ. ദീപ ജോസഫ് എന്നിവരെയും പ്രതിചേർത്തിട്ടുണ്ട്. കേസിൽ രഞ്ജിത പുളിക്കനാണ് ഒന്നാം പ്രതി. ദീപ ജോസഫ് രണ്ട് പോസ്റ്റുകളിലൂടെ പരാതിക്കാരിയെ അപമാനിച്ചുവെന്നാണ് പോലീസ് കണ്ടെത്തൽ.
അതിനിടെ, ബലാത്സംഗക്കേസിൽ പ്രതിയായ രാഹുൽ മാങ്കൂട്ടത്തിൽ എംഎൽഎയ്ക്കായുള്ള അന്വേഷണം പോലീസ് ഊർജ്ജിതമാക്കി. സംസ്ഥാനത്തെ എല്ലാ ജില്ലകളിലും പ്രത്യേക പോലീസ് സംഘത്തെ ഇതിനായി നിയോഗിച്ചിട്ടുണ്ട്. കൂട്ടുപ്രതി ജോബി ജോസഫിനായും തിരച്ചിൽ ശക്തമാണ്. രാഹുൽ മാങ്കൂട്ടത്തിലിന്റെ കൂടുതൽ സുഹൃത്തുക്കളെ പോലീസ് ചോദ്യം ചെയ്യുമെന്നും അറിയിച്ചു.
അതേസമയം, രാഹുൽ ഈശ്വർ തെറ്റ് ചെയ്തിട്ടില്ലെന്നും അതിജീവിതയുടെ വിവരങ്ങൾ വെളിപ്പെടുത്തിയിട്ടില്ലെന്നും ഭാര്യ ദീപ രാഹുൽ ഈശ്വർ പ്രതികരിച്ചു.
