തദ്ദേശ സ്വയംഭരണ തെരഞ്ഞെടുപ്പ് പ്രചരണ രംഗത്ത് സജീവമായി തുടരുമെന്ന പാലക്കാട് എംഎൽഎ രാഹുൽ മാങ്കൂട്ടത്തിലിന്റെ നിലപാടിനെ തള്ളി കോൺഗ്രസ് പ്രവർത്തക സമിതി അംഗം രമേശ് ചെന്നിത്തല. രാഹുൽ മാങ്കൂട്ടത്തിലിനെ കെപിസിസി പ്രസിഡന്റ് സസ്പെൻഡ് ചെയ്തതാണെന്നും, അദ്ദേഹത്തെ ഉൾപ്പെടുത്തി പ്രചരണം തുടരുന്ന കാര്യത്തിൽ കെപിസിസിയാണ് അന്തിമ തീരുമാനമെടുക്കേണ്ടതെന്നും ചെന്നിത്തല വ്യക്തമാക്കി.
കെ. സുധാകരൻ ഉൾപ്പെടെ എല്ലാവരും ഏകകണ്ഠമായി എടുത്ത തീരുമാനമായിരുന്നു രാഹുലിനെ സസ്പെൻഡ് ചെയ്തതെന്നും ചെന്നിത്തല പറഞ്ഞു. പാർട്ടി നടപടി നേരിടുന്ന വ്യക്തി എങ്ങനെ പാർട്ടി പരിപാടികളിൽ പങ്കെടുത്തു എന്നതിനെക്കുറിച്ച് തനിക്ക് അറിയില്ല. ഇക്കാര്യം പരിശോധിക്കേണ്ടത് കെപിസിസിയുടെ ചുമതലയാണെന്നും അദ്ദേഹം തിരുവനന്തപുരത്ത് മാധ്യമങ്ങളോട് പ്രതികരിച്ചു.
ലൈംഗിക ആരോപണം നേരിടുന്ന രാഹുൽ മാങ്കൂട്ടത്തിലിന് പിന്തുണയുമായി മുൻ കെപിസിസി പ്രസിഡന്റ് കെ. സുധാകരൻ നേരത്തെ രംഗത്തെത്തിയിരുന്നു. രാഹുൽ നിരപരാധിയാണെന്നും സജീവമായി രംഗത്ത് വരണമെന്നും സുധാകരൻ പറഞ്ഞിരുന്നു. സുധാകരന്റെ ഈ നിലപാടിന് പിന്നാലെയാണ് പാർട്ടിയിൽ അച്ചടക്കം ആവശ്യപ്പെട്ടുകൊണ്ട് ചെന്നിത്തല രംഗത്തെത്തിയിരിക്കുന്നത്.
അതേസമയം, രാഹുലിന്റേതായി പുറത്തുവന്ന വിവാദ ഓഡിയോ സന്ദേശം താൻ കേട്ടിട്ടില്ലെന്ന് പറഞ്ഞ ചെന്നിത്തല, ‘കേൾക്കേണ്ട ഏർപ്പാട് ഒന്നുമല്ലല്ലോ അത്’ എന്നായിരുന്നു പ്രതികരിച്ചത്.
കൂടാതെ, കോൺഗ്രസ് രാഹുലിനെതിരെ നടപടിയെടുത്തത് ചൂണ്ടിക്കാട്ടിയ ചെന്നിത്തല, ശബരിമല വിഷയത്തിൽ അറസ്റ്റിലായ എ. പത്മകുമാറിനും എൻ. വാസുവിനും എതിരെ നടപടിയെടുക്കാൻ സി.പി.എം. സംസ്ഥാന സെക്രട്ടറി എം.വി. ഗോവിന്ദന് ധൈര്യമുണ്ടോയെന്നും ചോദിച്ചു . തദ്ദേശ തെരഞ്ഞെടുപ്പിൽ യുഡിഎഫ് വലിയ വിജയം നേടുമെന്നും അദ്ദേഹം അവകാശപ്പെട്ടു.
നേരുത്തെ, കോൺഗ്രസ് നേതാക്കൾ രാഹുലുമായി വേദി പങ്കിട്ടില്ലെന്ന് മുതിർന്ന നേതാവ് കെ മുരളീധരൻ പ്രതികരിച്ചിരുന്നു.
