ഡൽഹി ചെങ്കോട്ടയ്ക്ക് സമീപം നടന്ന സ്ഫോടനത്തിന് വേണ്ടി പ്രതികൾക്ക് ലഭിച്ചത് വൻതോതിലുള്ള സ്ഫോടക വസ്തുക്കളാണെന്ന് കണ്ടെത്തൽ. മൊത്തം 3,200 കിലോ സ്ഫോടക വസ്തുക്കൾ കിട്ടിയിരുന്നുവെന്ന് അന്വേഷണ ഏജൻസികൾക്ക് വിവരം ലഭിച്ചതായാണ് റിപ്പോർട്ടുകൾ.
ഇതുവരെ നടത്തിയ തിരച്ചിലിൽ 2,900 കിലോ സ്ഫോടക വസ്തുക്കൾ മാത്രമാണ് സുരക്ഷാ ഏജൻസികൾക്ക് കണ്ടെത്താൻ കഴിഞ്ഞിട്ടുള്ളത്. 300 കിലോ സ്ഫോടക വസ്തുക്കൾ ഇനിയും കണ്ടെത്താനുണ്ട്.
ഭീകരസംഘത്തിൽ കൂടുതൽ പേരുണ്ടെന്ന നിഗമനത്തിലാണ് അന്വേഷണ ഏജൻസികൾ. ഭീകരരുമായി ബന്ധമുള്ള മറ്റ് സ്ഥലങ്ങളിലും, ഹരിയാന പോലീസ് ഉൾപ്പെടെയുള്ളവരുടെ നേതൃത്വത്തിലും വ്യാപകമായ പരിശോധനകൾ നടന്നുവരികയാണ്.
രാജ്യത്തെ നടുക്കിയ സ്ഫോടന പരമ്പരയുടെ പശ്ചാത്തലത്തിൽ, ഇത്രയധികം സ്ഫോടക വസ്തുക്കൾ രാജ്യത്തേക്ക് കടത്തിയതിൻ്റെ ഉറവിടം, വിതരണം, ഭീകരരുടെ ലക്ഷ്യം തുടങ്ങിയ കാര്യങ്ങളെല്ലാം വിശദമായി അന്വേഷിച്ചു വരികയാണ്.
ചെങ്കോട്ട (Red Fort) മെട്രോ സ്റ്റേഷന് സമീപം തിങ്കളാഴ്ച വൈകുന്നേരമാണ് സ്‌ഫോടനമുണ്ടായത്. അന്വേഷണം എൻഐഎ ഏറ്റെടുത്തിരുന്നു. കുറഞ്ഞത് 10 പേർ കൊല്ലപ്പെടുകയും 20 പേർക്ക് പരിക്കേൽക്കുകയും ചെയ്ത സ്‌ഫോടനക്കേസിൽ നിർണായക വിവരങ്ങളാണ് പുറത്ത് വന്നു കൊണ്ടിരിക്കുന്നത്.
പ്രധാന പ്രതികളിലൊരാളായ ഡോ. മുസമ്മിൽ ഗനായിയുടെ മൊബൈൽ ഡാറ്റയിൽ നിന്നും ഇയാൾ ഈ വർഷം ജനുവരിയിൽ ചെങ്കോട്ട പ്രദേശത്ത് നിരവധി തവണ പരിശോധന നടത്തിയിരുന്നു എന്ന് കണ്ടെത്തി.
ഭീകര മൊഡ്യൂളുമായി ബന്ധപ്പെട്ട് മൂന്ന് ഡോക്ടർമാർ അറസ്റ്റിലായ സാഹചര്യത്തിൽ, ഹരിയാനയിലെ ഫരീദാബാദിലെ അൽ-ഫലാഹ് യൂണിവേഴ്സിറ്റിയും 76 ഏക്കറോളം വരുന്ന കാമ്പസും ഇപ്പോൾ നിരീക്ഷണത്തിലാണ്. വിദ്യാസമ്പന്നരായ വ്യക്തികൾ പാക് പിന്തുണയുള്ളവരുടെ നിർദ്ദേശപ്രകാരം പ്രവർത്തിച്ചു എന്ന കണ്ടെത്തലിനെ തുടർന്ന്, യൂണിവേഴ്സിറ്റി എങ്ങനെയാണ് ഇവർക്ക് താവളമായതെന്ന കാര്യം അന്വേഷണ ഏജൻസികൾ പരിശോധിച്ച് വരികയാണ്.
എന്നാൽ സ്ഫോടനം നടന്ന i20 കാർ കഴിഞ്ഞ പത്ത് പതിനൊന്ന് ദിവസമായി ഡോ. മുസമ്മിൽ ജോലി ചെയ്തിരുന്ന അൽ-ഫലാഹ് യൂണിവേഴ്സിറ്റിയിൽ ഉണ്ടായിരുന്നു എന്ന സോഷ്യൽ മീഡിയയിലെ പ്രചാരണം ഫരീദാബാദ് പോലീസ് നിഷേധിച്ചു.
സ്ഫോടനത്തിന് ഉപയോഗിച്ച കാർ ഓടിച്ചിരുന്നതും ഭീകര മൊഡ്യൂളുമായി ബന്ധമുണ്ടായിരുന്നതുമായ ജമ്മു കശ്മീരിലെ പുൽവാമ സ്വദേശിയായ ഉമർ നബി എന്ന ഡോക്ടറിലേക്കാണ് അന്വേഷണം നീളുന്നത്. ബന്ധം സ്ഥിരീകരിക്കുന്നതിനായി ജമ്മു കശ്മീർ പോലീസ് നബിയുടെ അമ്മയിൽ നിന്ന് ഡിഎൻഎ സാംപിൾ ശേഖരിച്ചു.
റെയ്ഡുകൾ കാരണം പ്രതി പരിഭ്രാന്തനാകുകയും സാധനങ്ങൾ ധൃതിയിൽ മാറ്റാൻ ശ്രമിക്കുകയും ചെയ്തതാണ് അപകടത്തിന് കാരണമായതെന്ന് അന്വേഷണ ഉദ്യോഗസ്ഥർ വെളിപ്പെടുത്തി.പ്രാഥമിക നിഗമനമായ ചാവേർ ആക്രമണത്തിൽ നിന്ന്, സാധനങ്ങൾ കൊണ്ടുപോകുന്നതിനിടെ അബദ്ധത്തിൽ സംഭവിച്ച തായാണ് നിലവിലെ നിഗമനം.
സ്ഫോടന സ്ഥലത്ത് നിന്ന് ഫോറൻസിക് വിദഗ്ധർ സ്ഫോടക വസ്തുക്കളുടെ അവശിഷ്ടങ്ങളും കാട്രിഡ്ജുകളും കണ്ടെടുത്തു. ഫൊറൻസിക് സയൻസ് ലബോറട്ടറി (എഫ്എസ്എൽ) സംഘം 40-ൽ അധികം സാംപിളുകൾ ശേഖരിച്ചതിൽ, രണ്ട് തരം സ്ഫോടക വസ്തുക്കളുടെ അംശങ്ങളും ഒരു ലൈവ് കാട്രിഡ്ജ് ഉൾപ്പെടെയുള്ള രണ്ട് കാട്രിഡ്ജുകളും ഉൾപ്പെടുന്നു.
