പാലക്കാട് നഗരസഭയിലേക്കുള്ള സ്ഥാനാർത്ഥി നിർണയത്തെ ചൊല്ലി ബിജെപിയിൽ കടുത്ത ചേരിപ്പോര്. നിലവിലെ നഗരസഭാധ്യക്ഷ പ്രമീള ശശിധരൻ, സ്ഥാനാർത്ഥി പട്ടിക ഏകപക്ഷീയമാണെന്ന് ആരോപിച്ച് പരസ്യമായി രംഗത്തെത്തി. തന്നെ പാർട്ടിയിലെ ഒരു വിഭാഗം ഒറ്റപ്പെടുത്തി ക്രൂശിക്കുകയാണെന്നും പ്രമീള ശശിധരൻ മാധ്യമങ്ങളോട് പറഞ്ഞു.
മുതിർന്ന നേതാക്കളായ പ്രമീള ശശിധരൻ, മുൻ വൈസ് ചെയർമാൻ ഇ കൃഷ്ണദാസ്, എൻ ശിവരാജൻ എന്നിവരടക്കം നിരവധി പേരെ പട്ടികയിൽ നിന്ന് ഒഴിവാക്കിയതോടെയാണ് പാർട്ടിയിൽ പ്രശ്നങ്ങൾ രൂക്ഷമായത്.
സ്ഥാനാർത്ഥി പട്ടിക ഏകപക്ഷീയമായി തയാറാക്കിയതാണ്. സ്വന്തക്കാരെ മാത്രം തിരുകിക്കയറ്റിയെന്നും പ്രമീള ആരോപിച്ചു. സ്ഥാനാർത്ഥി പ്രഖ്യാപന കൺവെൻഷനിലേക്ക് പോലും തന്നെ ക്ഷണിച്ചിട്ടില്ല. സി കൃഷ്ണകുമാർ പക്ഷമാണ് മുതിർന്ന നേതാക്കളെ ഉൾപ്പെടെ വെട്ടിനിരത്തിയതിന് പിന്നിലെന്നും അവർ ആരോപിച്ചു .
കഴിഞ്ഞ രണ്ടു തവണ താൻ വിജയിച്ച വാർഡുകളിലെ സ്ഥാനാർത്ഥികളെക്കുറിച്ചുള്ള വിവരം പോലും താൻ അറിയുന്നത് വൈകിയാണെന്നും ഇത് തനിക്ക് മാനസിക പ്രയാസമുണ്ടാക്കിയെന്നും പ്രമീള പറഞ്ഞു. സംസ്ഥാന നേതൃത്വത്തെ തൻ്റെ പ്രയാസങ്ങൾ അറിയിച്ചിട്ടുണ്ടെന്നും, പാർട്ടിയിൽ നേരിട്ട അവഗണന മൂലമാണ് കൺവെൻഷനിൽ നിന്ന് വിട്ടുനിന്നതെന്നും പ്രമീള വ്യക്തമാക്കി. അതേസമയം, കോൺഗ്രസ് എംഎൽഎ രാഹുൽ മാങ്കൂട്ടത്തിലിൻ്റെ പരിപാടിയിൽ പങ്കെടുത്തത് നഗരസഭാധ്യക്ഷ എന്ന ഔദ്യോഗിക പദവിയിൽ നിന്നാണെന്നും അവർ പറഞ്ഞു.
“ഇത്തവണ മത്സരിക്കാനില്ലെന്ന് താന്‍ ബിജെപി സംസ്ഥാന പ്രസിഡന്റിനെ അറിയിച്ചിരുന്നു. സി കൃഷ്ണകുമാര്‍ ഏകപക്ഷീയമായാണ് സ്ഥാനാർത്ഥി നിര്‍ണയം നടത്തിയതെന്നും പട്ടികയില്‍ ഒരു വിഭാഗത്തിന് മാത്രമാണ് പ്രധാന്യം ലഭിക്കുന്നതെന്നും ഇവിടുത്തെ പാര്‍ട്ടിക്കാര്‍ക്കും ജനങ്ങള്‍ക്കും വളരെ വ്യക്തമായി അറിയാം. അവരുടെ സ്വന്തക്കാര്‍ മാത്രമാണ് പട്ടികയില്‍ ഇടം പിടിച്ചത്. ഞാന്‍ കഴിഞ്ഞ രണ്ടുതവണ ജയിച്ച വാര്‍ഡുകളിലെ സ്ഥാനാർത്ഥികളെ പ്രഖ്യാപിച്ച കാര്യം ഇന്നലെ വൈകിട്ടാണ് അറിഞ്ഞത്. ആരൊക്കെയാണ് മത്സരിക്കുന്നതെന്ന് പോലും പറയാന്‍ ജില്ലാ നേതൃത്വം തയ്യാറായിട്ടില്ല,” പ്രമീള ശശിധരൻ പറഞ്ഞു.
