ശബരിമല ദർശനത്തിന് അഭൂതപൂർവ്വമായ തിരക്ക്. ഈ മണ്ഡല കാലത്തിന്റെ രണ്ടാം ദിവസമായ ഇന്ന് നിയന്ത്രണാതീതമായ തിരക്കിൽ ഭക്തർ മണിക്കൂറുകളോളം ക്യൂവിൽ നിൽക്കുകയാണ്. ഭക്തജന തിരക്ക് അപകടകരമായ രീതിയിലാണെന്ന് ദേവസ്വം ബോർഡ് പ്രസിഡന്റ് കെ ജയകുമാർ പറഞ്ഞു. ഭയാനകമെന്നാണ് ജയകുമാർ തിരക്കിനെ വിശേഷിപ്പിച്ചത്. നിലവിലെ സ്ഥിതി നിയന്ത്രിക്കുമെന്നും അദ്ദേഹം പറഞ്ഞു. വൃശ്ചികം ഒന്നായ ഇന്നലെയാണ് ഈ വർഷത്തെ തീർത്ഥാടനത്തിനായി ശബരിമല നട തുറന്നത്.
“രണ്ടാം ദിവസമായ ഇന്ന് ഇത്രയും തിരക്ക് അപ്രതീക്ഷിതം. അപകടരമായ രീതിയിലുള്ള തിരക്കാണ്. ക്യൂവിൽ നിൽക്കാതെ ചാടി വന്നവരുണ്ട്. ജീവിതത്തിൽ ഇത്രയും തിരക്ക് കണ്ടിട്ടില്ല. ക്യൂവിൽ നിൽക്കാതെ ചാടി വരുന്നത് ക്യൂവിൽ അധിക സമയം നിൽക്കേണ്ടി വരുന്നതിനാലാണ്. പതുക്കെ പതുക്കെ ഇവരെയെല്ലാം പതിനെട്ടാം പടി കയറ്റാൻ ചാർ‌ജ് ഓഫീസറോട് പറഞ്ഞു. ഇങ്ങനെയൊരു ആൾക്കൂട്ടം ഇവിടെ വരാൻ പാടില്ലായിരുന്നു,” ജയകുമാർ വാർത്താസമ്മേളനത്തിൽ പറഞ്ഞു.
മരക്കൂട്ടത്തെയും ശരം കുത്തിയിലെയും ക്യൂ കോംപ്ലക്സുകളുടെ ഉദ്ദേശം നടപ്പായിട്ടില്ല. ഭക്തർ അവിടെ കയറുന്നില്ലെന്ന് പൊലീസ് പറയുന്നു. ഭക്തർക്ക് ബിസ്കറ്റ് മാത്രമല്ല, കൂടുതൽ സൗകര്യങ്ങൾ ഉറപ്പാക്കിയാൽ അവർ അവിടെ കയറി ഇരിക്കും. ഭക്തരെ നിർബന്ധമായും ക്യൂ കോംപ്ലക്സിൽ ഇരുത്തണം. അതിനായി അനൗൺസ്മെന്റ് വേണം. അല്ലാതെ അവർക്ക് അറിയില്ല. അവരുടെ അവസരം വരുമ്പോൾ കയറ്റണമെന്നും ജയകുമാർ പറഞ്ഞു.
ശബരിമല ഡ്യൂട്ടിക്കായി നിയോഗിച്ച പോലീസ് ഉദ്യോഗസ്ഥരടക്കമുള്ള പല ജീവനക്കാരും ഇതുവരെ ജോലിക്ക് ഹാജരായിട്ടില്ല. ഏഴ് അഡീഷണൽ ബൂത്തുകൾ സ്പോട്ട് ബുക്കിംഗിനായി ഇന്ന് നിലയ്ക്കലിൽ സ്ഥാപിക്കും. പമ്പയിലേക്കുള്ള സ്പോട്ട് ബുക്കിംഗ് കുറയ്ക്കും. ഓൺലൈൻ ബുക്കിംഗ് ആദ്യ ദിവസം തന്നെ തീർന്നതായും സ്പോട്ട് ബുക്കിംഗ് അനുവദിച്ചില്ലെങ്കിൽ തിരക്ക് നിയന്ത്രിക്കാൻ കഴിയില്ലെന്നും അദ്ദേഹം കൂട്ടിച്ചേർത്തു.
തിരുവിതാംകൂർ ദേവസ്വം ബോർഡിൻ്റെ കണക്കുകൾ പ്രകാരം ഒരു ദിവസം ഉൾക്കൊള്ളാൻ കഴിയുന്ന പരമാവധി തീർത്ഥാടകരുടെ എണ്ണം 90,000 ആണ്. ആ പരിധി മറികടന്ന് ഭക്തജന പ്രവാഹമാണ് ഇന്ന് സന്നിധാനത്തേക്ക് ഒഴുകിയെത്തിയത്. നട തുറന്ന ഇന്നലെ 53,278 പേർ ദർശനം നടത്തിയെങ്കിൽ, ഇന്നത് 98,915 ആയി.
തിരക്കിന് പ്രധാന കാരണം വെർച്വൽ ക്യൂവിലെ പാളിച്ചകളാണെന്ന് സുരക്ഷാ ചുമതലയുള്ള എഡിജിപി എസ്. ശ്രീജിത്ത് പറഞ്ഞു. ഒരു ദിവസം 90,000 പേർക്ക് മാത്രമാണ് ദർശനത്തിന് അനുമതി നൽകുന്നതെങ്കിലും, അതിലും കൂടുതൽ പേർ സ്ഥലത്തെത്തുന്നു. മാത്രമല്ല, ബുക്ക് ചെയ്ത സമയക്രമം പലരും പാലിക്കാത്തതും തിരക്ക് വർദ്ധിക്കാൻ കാരണമായി.
അതേസമയം, ബംഗളൂരു, സേലം എന്നിവിടങ്ങളിൽ നിന്നുള്ള ഭക്തർ ദർശനം കിട്ടാതെ മടങ്ങിയതായും വിവരമുണ്ട്. പന്തളം വലിയ കോയിക്കൽ ക്ഷേത്രത്തിൽ നെയ്യഭിഷേകം നടത്തി അവർ മടങ്ങിയതായാണ് വിവരം.
