ശബരിമല അന്നദാനത്തിൽ ‘വിചിത്രമായ’ വിഭവങ്ങൾ ഒഴിവാക്കി ഇനിമുതൽ പപ്പടവും പായസവും അച്ചാറും ഉൾപ്പെടുന്ന കേരള സദ്യ നൽകാൻ തീരുമാനിച്ചതായി തിരുവിതാംകൂർ ദേവസ്വം ബോർഡ് പ്രസിഡൻ്റ് കെ. ജയകുമാർ. നിലവിൽ അന്നദാനമായി നൽകിയിരുന്ന പുലാവും സാമ്പാറും അടങ്ങിയ മെനു ഭക്തർക്ക് അത്ര ഹിതകരമല്ലാത്ത സാഹചര്യത്തിലാണ് ഈ മാറ്റം.
“പുലാവും സാമ്പാറും നൽകിയിരുന്നത് ദേശീയ ഐക്യത്തിൻ്റെ പ്രതീകമായിട്ടായിരുന്നു; അതായത്, വടക്കേ ഇന്ത്യക്കാർക്ക് പ്രിയങ്കരമായ പുലാവും തെക്കേ ഇന്ത്യക്കാർക്ക് ഇഷ്ടമുള്ള സാമ്പാറും ചേർത്തുള്ള വിചിത്രമായ ഒരു മെനുവാണ് നിലനിന്നിരുന്നത്. ഇത് ഭക്തജനങ്ങള്‍ക്ക് ഹിതകരമായിരുന്നില്ല. അതുമാറ്റി കേരള സദ്യ നല്‍കാന്‍ ഇന്ന് തീരുമാനിച്ചു. ഇത് ദേവസ്വം ബോര്‍ഡിന്റെ കാശല്ല. ഭക്തജനങ്ങള്‍ തീർത്ഥാടകര്‍ക്കും അയ്യപ്പന്മാര്‍ക്കും അന്നദാനം നല്‍കാന്‍ ഏല്‍പ്പിച്ചിരിക്കുന്ന കാശാണിത്. ഭക്തജനങ്ങൾ നൽകിയ പണമുപയോഗിച്ച് അയ്യപ്പഭക്തർക്ക് ഏറ്റവും മികച്ച രീതിയിൽ അന്നദാനം നൽകാൻ ബോർഡിന് ബാധ്യതയുണ്ടെന്നും, അത് ഉറപ്പുവരുത്തുമെന്നും ജയകുമാർ മാധ്യമങ്ങളോട് പറഞ്ഞു.
കേരള സദ്യ ഒന്നോ രണ്ടോ ദിവസങ്ങൾക്കുള്ളിൽ തന്നെ നടപ്പാക്കാൻ ദേവസ്വം കമ്മീഷണർക്ക് നിർദേശം നൽകിയിട്ടുണ്ട്. കൂടാതെ, പന്തളത്തെ അന്നദാനത്തിൻ്റെ ഗുണമേന്മ മെച്ചപ്പെടുത്തുമെന്നും അദ്ദേഹം അറിയിച്ചു. പമ്പാ സദ്യക്ക് അയ്യപ്പൻ്റെ ചരിത്രവുമായി ബന്ധമുണ്ട്. പണ്ട് ഒരുപാട് പേര്‍ സദ്യ കൊടുക്കുമായിരുന്നു. ഇപ്പോള്‍ നമ്മള്‍ തന്നെയാണ് ചെയ്യുന്നത്. അതുകൊണ്ട് തന്നെ അന്നദാനത്തിന്റെ ഗുണമേന്മ മെച്ചപ്പെടുത്താന്‍ ബാധ്യതയുണ്ടെന്നും ജയകുമാർ ചൂണ്ടിക്കാട്ടി.
ശബരിമല മാസ്റ്റർപ്ലാനുമായി ബന്ധപ്പെട്ട് ജസ്റ്റിസ് സിരിജഗനുമായി ചർച്ച നടത്തിയതായും അടുത്ത വർഷത്തെ തീർത്ഥാടന സീസണിനുള്ള ഒരുക്കങ്ങൾ ഫെബ്രുവരിയിൽ തന്നെ തുടങ്ങുമെന്നും ജയകുമാർ അറിയിച്ചു. സൗകര്യങ്ങൾ മെച്ചപ്പെടുത്തുന്നതിൽ മാസ്റ്റർപ്ലാനിലെ പല പദ്ധതികളും സമയബന്ധിതമായി പൂർത്തിയാക്കേണ്ടതുണ്ടെന്നും അദ്ദേഹം പറഞ്ഞു.
