ശബരിമല സ്വർണ്ണക്കൊള്ളക്കേസിൽ ദേവസ്വം ബോർഡ് മുൻ സെക്രട്ടറി എസ് ജയശ്രീയുടെ മുൻകൂർ ജാമ്യ ഹർജി തള്ളി. ദ്വാരപാലകപാളി കേസിൽ നാലാം പ്രതിയാണ് ജയശ്രീ. ദ്വാരപാലക പാളികൾ കൊടുത്തു വിടാനുള്ള ദേവസ്വം ബോർഡ് മിനിട്ട്സിൽ ഇവർ തിരുത്തൽ വരുത്തിയെന്നാണ് അന്വേഷണ സംഘത്തിന്റെ കണ്ടെത്തൽ. മുൻകൂർ ജാമ്യഹർജി തള്ളിയതോടെ ജയശ്രീയുടെ അറസ്റ്റ് ഉടൻ ഉണ്ടായേക്കും.
ചെമ്പു പാളികൾ ഉണ്ണികൃഷ്ണൻ പോറ്റിക്ക് കൊടുത്തു വിടണമെന്ന് ജയശ്രീ മിനുട്ട്സിൽ എഴുതിയതായി റിപ്പോർട്ടുകൾ പറയുന്നു. മുൻ ദേവസ്വം ബോർഡ് പ്രസിഡന്റും കമ്മീഷണറുമായ എൻ വാസുവിനെ നവംബർ 11 നാണ് പ്രത്യേക അന്വേഷണ സംഘം അറസ്റ്റ് ചെയ്തത്. ദേവസ്വം ബോർഡ് മുൻ പ്രസിഡന്റ് എം പത്മകുമാറിന് ചോദ്യം ചെയ്യലിനായി അന്വേഷണ സംഘം നോട്ടീസ് നൽകിയിട്ടുണ്ട്. പത്മകുമാറിനെ ഉടൻ ചോദ്യം ചെയ്യും. പത്മകുമാറിൻറെ സെക്രട്ടറി അടക്കമുള്ളവരെ വിളിച്ചുവരുത്തി അന്വേഷണ സംഘം വിവരങ്ങൾ തേടിയിട്ടുണ്ട്.
അതേസമയം ശബരിമല സ്വർണ്ണക്കൊള്ളക്കേസിൽ 2019 ലെ വിവാദ ഫയലുകൾ കൈകാര്യം ചെയ്ത ഉദ്യോഗസ്ഥന് നിർബന്ധിത അവധിക്ക് പിന്നാലെ സ്ഥലം മാറ്റം. എൻ വാസു ദേവസ്വം കമ്മീഷണർ ആയിരിക്കെ വാസുവിൻ്റെ ഓഫീസിലെ ശബരിമല സെക്ഷൻ ക്ലർക്കായിരുന്നു ശ്യാം പ്രകാശിനെയാണ് സ്ഥലം മാറ്റിയിരിക്കുന്നത്. ദേവസ്വം വിജിലൻസ് തിരുവനന്തപുരം സോൺ ഓഫീസർ ആയിരുന്നു ശ്യാം പ്രകാശ്. വർക്കല ഗ്രൂപ്പിലേക്കാണ് സ്ഥലം മാറ്റിയത്. വർക്കല അസിസ്റ്റൻ്റ് ദേവസ്വം കമ്മീഷണർ ആയിട്ടാണ് സ്ഥലംമാറ്റം.
സ്വർണ്ണക്കൊള്ളക്കേസ് അന്വേഷണം തുടങ്ങിയ ശേഷമാണ് ശ്യാം പ്രകാശ് തന്റെ ഓഫീസിൽ ഉണ്ടെന്ന് വിജിലൻസ് എസ് പി അറിഞ്ഞത്. തുടർന്ന് നിർബന്ധിത അവധിയിൽ പോകാൻ നിർദ്ദേശിക്കുകയായിരുന്നു. പിന്നാലെയാണ് സ്ഥലംമാറ്റം. സ്വർണം ചെമ്പാണെന്നെഴുതിയ ഫയലുകൾ കൈകാര്യം ചെയ്തത് ശ്യാം പ്രകാശായിരുന്നു.
