ശബരിമല സ്വർണ്ണക്കവർച്ച കേസിലെ അന്വേഷണം പൂർത്തിയാക്കാൻ പ്രത്യേക അന്വേഷണ സംഘത്തിന് (SIT) ഹൈക്കോടതി ആറാഴ്ച കൂടി സമയം അനുവദിച്ചു. അന്വേഷണ സംഘത്തിന്റെ അഭ്യർത്ഥന പരിഗണിച്ചാണ് ഹൈക്കോടതി ദേവസ്വം ബെഞ്ചിന്റെ നടപടി.
കേസിലെ അന്വേഷണ പുരോഗതി വിവരിക്കുന്ന മൂന്നാം ഘട്ട റിപ്പോർട്ട് മുദ്ര വച്ച കവറിൽ പ്രത്യേക അന്വേഷണ സംഘം (SIT) കോടതിയിൽ സമർപ്പിച്ചു. നിലവിൽ നടക്കുന്ന അന്വേഷണത്തിൽ കോടതി തൃപ്തി രേഖപ്പെടുത്തിയിട്ടുണ്ട്. അതോടൊപ്പം തന്നെ, കേസിലെ അന്വേഷണം സ്വതന്ത്രവും നിഷ്പക്ഷവുമായി തുടരണമെന്നും കോടതി അന്വേഷണ ഉദ്യോഗസ്ഥരോട് നിർദ്ദേശിച്ചു.
സന്നിധാനത്തു നിന്ന് ശേഖരിച്ച സ്വർണ്ണ സാമ്പിളുകൾ വിദഗ്ദ്ധ പരിശോധനയ്ക്കായി അയച്ചിട്ടുണ്ടെന്നും ഇതിന്റെ ഫലം ഒരാഴ്ചയ്ക്കുള്ളിൽ ലഭിക്കുമെന്നും പോലീസ് കോടതിയെ അറിയിച്ചു. ഇതിനിടെ, സ്വർണ്ണക്കൊള്ളയുമായി ബന്ധപ്പെട്ട കള്ളപ്പണ ഇടപാടുകൾ പരിശോധിക്കുന്നതിനായി കേസ് രേഖകൾ ആവശ്യപ്പെട്ട് എൻഫോഴ്സ്മെന്റ് ഡയറക്ടറേറ്റ് (ED) നൽകിയ ഹർജി പരിഗണിക്കാൻ ഹൈക്കോടതി ഡിവിഷൻ ബെഞ്ച് മജിസ്ട്രേറ്റ് കോടതിക്ക് നിർദ്ദേശം നൽകി.
സംസ്ഥാന സർക്കാരിന്റെ ഭാഗം കൂടി കേട്ട ശേഷമായിരിക്കണം ഇക്കാര്യത്തിൽ തീരുമാനമെടുക്കേണ്ടതെന്നും കോടതി വ്യക്തമാക്കിയിട്ടുണ്ട്.
