ബൂത്ത് ലെവൽ ഓഫീസർ (BLO) അനീഷ് ജോർജ്ജ് ആത്മഹത്യ ചെയ്ത സംഭവവുമായി എസ്ഐആർ (Special Intensive Revision) നു ബന്ധമില്ലെന്ന് ജില്ലാ കളക്ടറുടെ റിപ്പോർട്ട്. ഇതു സംബന്ധിച്ച പ്രാഥമിക റിപ്പോർട്ട് ജില്ലാ കളക്ടര്‍ മുഖ്യ തെരഞ്ഞെടുപ്പ് ഓഫീസര്‍ക്ക് കൈമാറി. പയ്യന്നൂർ കാങ്കോൽ ആലപ്പടമ്പ് പഞ്ചായത്ത് ഒന്നാം വാർഡ് (ഏറ്റുകുടുക്ക) പത്താം നമ്പർ ബൂത്തിന്റെ ചുമതലയുള്ള തറയിൽ വീട്ടിൽ അനീഷ് ജോർജ്ജ് (44) ആണ് മരിച്ചത്. ഏറ്റുകുടുക്കയിലെ വീട്ടിൽ ഇന്നലെയാണ് അനീഷിനെ മരിച്ച നിലയിൽ കണ്ടെത്തിയത്.
കുന്നരു യു പി സ്‌കൂളിലെ ഓഫീസ് അറ്റൻഡർ ആയിരുന്നു അനീഷ്. പൂരിപ്പിച്ച ഫോം തിരികെ വാങ്ങി യഥാസമയം അപ്‌ലോഡ് ചെയ്യാൻ കഴിയുമോയെന്ന ആശങ്ക അനീഷ് അടുത്ത സുഹൃത്തക്കളോട് പങ്ക് വച്ചിരുന്നു. എസ്ഐആറിന്റെ ഭാഗമായുള്ള എന്യൂമറേഷൻ ഫോം വിതരണം ഇന്നലെ പൂർത്തിയാക്കണമെന്നും നിർദ്ദേശം ഉണ്ടായിരുന്നു. ഇതും അനീഷിനെ സമ്മർദ്ദത്തിലാക്കിയിരുന്നു.
417 വീടുകളിലായി 1149 ഫോം നൽകാനും പൂരിപ്പിച്ചവ വാങ്ങി അപ്‌ലോഡ് ചെയ്യാനുമായിരുന്നു അനീഷിനുണ്ടായിരുന്ന ചുമതല ഇതിൽ 35 വീടുകളിലെ ഫോം വിതരണം ബാക്കിയുണ്ടായിരുന്നു. ഫോം നൽകേണ്ടവരിൽ പലരേയും അനീഷിന് അറിയില്ലായിരുന്നു. ഈ കാര്യത്തിൽ അനീഷിനെ സഹായിക്കാനായി സുഹൃത്തുക്കൾ ഇന്നലെ രണ്ട് സ്ഥലത്തായി എസ്ഐആർ (SIR) ക്യാമ്പുകൾ സംഘടിപ്പിച്ചിരുന്നു. അവിടെ കാത്ത് നിന്ന വോട്ടർന്മാരിലേക്ക് അനീഷിന്റെ മരണ വാർത്തയാണ് എത്തിയത്.
തൂങ്ങി മരിച്ച നിലയിലാണ് അനീഷിനെ കണ്ടത്. അതേസമയം സിപിഎമ്മിന്റെ ഭീഷണിയാണ് അനീഷിനെ മരണത്തിലേക്ക് നയിച്ചതെന്ന് കോൺഗ്രസും ബിജെപിയും ആരോപിച്ചു. എസ്ഐആറുമായി ബന്ധപ്പെട്ട ജോലിക്കിടെ കോൺഗ്രസ് ബൂത്ത് ഏജന്റിനെ കൂടെ കൊണ്ടു പോയതിന് അനീഷിനെ സിപിഎം പ്രവർത്തകർ ഭീഷണിപ്പെടുത്തിയതായും ഇതിന്റെ ഡിജിറ്റൽ തെളിവുകൾ പുറത്തു വിടുമെന്നും കോൺഗ്രസ് നേതാക്കൾ പറഞ്ഞു.
അനീഷിന്റെ മരണവുമായി ബന്ധപ്പെട്ടുള്ള പൊലീസ് അന്വേഷണത്തിലെ വിവരങ്ങളാണ് കളക്ടറുടെ റിപ്പോര്‍ട്ടില്‍ ഉള്ളത്. കൂടുതല്‍ അന്വേഷണം തുടരുമെന്നും റിപ്പോർട്ടിലുണ്ട്.
