രാഹുൽ മാങ്കൂട്ടത്തിലിനെതിരായ ലൈംഗിക പീഡന കേസ് അന്വേഷിക്കാൻ പ്രത്യേക സംഘം. തിരുവനന്തപുരം സിറ്റി പൊലീസ് കമ്മീഷണർ തോംസൺ ജോസ് നേതൃത്വം നൽകുന്ന സംഘത്തിൽ ഡെപ്യൂട്ടി കമ്മീഷണർ ഓഫ് പോലീസ് (ഡിസിപി-DCP) യും ഒരു അസിസ്റ്റന്റ് കമ്മീഷണറും ഉണ്ടാകും. ഇതു സംബന്ധിച്ച ഉത്തരവ് ഇന്ന് വൈകുന്നേരം ഇറങ്ങുമെന്നാണ് വിവരം. അതേസമയം, രാഹുൽ മാങ്കൂട്ടത്തിൽ മുൻകൂർ ജാമ്യാപേക്ഷ നൽകി.
തിരുവനന്തപുരം റൂറൽ മേഖലയിലാണ് കേസ് സംബന്ധിച്ച എഫ്ഐആര്‍ രജിസ്റ്റര്‍ ചെയ്തത്. എന്നാൽ സിറ്റി പൊലീസ് കമ്മീഷണറുടെ കീഴിൽ വരുന്ന നേമം സ്റ്റേഷൻ പരിധിയിലാണ് കുറ്റകൃത്യം നടന്നത്. ഇതിനാലാണ് നേമം സ്റ്റേഷനിലേക്ക് കേസ് കൈമാറിയിരിക്കുന്നത്. ഇവിടുത്തെ ഉദ്യോഗസ്ഥരാണ് പരാതിക്കാരിയുടെ മൊഴി രേഖപ്പെടുത്തിയത്.
തിരുവനന്തപുരം ജില്ലാ കോടതിയിലാണ് രാഹുൽ മുൻകൂർ ജാമ്യാപേക്ഷ നൽകിയത്. യുവതിയുമായി സൗഹൃദമുണ്ടെന്ന് ജാമ്യാപേക്ഷയിൽ പറയുന്നു.
ലൈംഗിക പീഡനം, നിർബന്ധിത ഗർഭഛിദ്രം, വധ ഭീഷണി എന്നീ കുറ്റങ്ങളാണ് രാഹുലിനെതിരെ ചുമത്തിയിട്ടുള്ളത്. ഇവ വെളിവാക്കുന്ന ഓഡിയോ ക്ലിപ്പുകൾ ടെലിവിഷൻ ചാനലുകളാണ് പുറത്ത് വിട്ടത്. തുടർന്ന് യുവതി ഇന്നലെ മുഖ്യമന്ത്രിക്ക് പരാതി നൽകി.
