രാഹുൽ മാങ്കൂട്ടത്തിലിനെതിരെയുള്ള ലൈംഗിക പീഡന കേസിൽ രാഹുലടക്കം രണ്ട് പേരെ പ്രതി ചേർത്തു. രാഹുലിന്റെ സുഹൃത്ത് ജോബി ജോസഫാണ് രണ്ടാം പ്രതി. ഇന്നലെ മുഖ്യമന്ത്രിക്ക് യുവതി നൽകിയ പരാതിയിൽ തിരുവനന്തപുരം വലിയമല പൊലീസാണ് രാഹുലിനെതിരെ കേസെടുത്തത്. ജാമ്യമില്ലാ വകുപ്പാണ് ചുമത്തിയിരിക്കുന്നത്.
തിരുവനന്തപുരം റൂറൽ എസ്‌പി നടത്തിയ മൊഴിയെടുക്കൽ അ‍ഞ്ചരമണിക്കൂറിലേറെ നീണ്ടു. ഇരുപത് പേജ് വരുന്ന മൊഴിയാണ് യുവതി നൽകിയതെന്നാണ് റിപ്പോർട്ടുകൾ. കേസ് പിന്നീട് നേമം പൊലീസിനു കൈമാറി. ലൈംഗികപീഡനം, ഗർഭഛിദ്രത്തിനു പ്രേരണ, വധഭീഷണി തുടങ്ങിയവയാണ് പരാതിയിലുള്ളത്. നിർബന്ധിത ഭ്രൂണഹത്യയ്ക്ക് പുറമെ ദേഹോപദ്രവം ഏൽപ്പിക്കൽ, വിശ്വാസവഞ്ചനാ തുടങ്ങിയ കുറ്റങ്ങളും ചുമത്തിയിട്ടുണ്ട്. പത്ത് വർഷം ജീവപര്യന്തം ശിക്ഷ വരെ ലഭിക്കാവുന്ന കുറ്റങ്ങളാണ് ചുമത്തിയിരിക്കുന്നത്. ആദ്യ ഓഡിയോ ക്ലിപ്പുകൾ പുറത്ത് വന്നതിന് പിന്നാലെ, പാലക്കാട് എംഎൽഎ യായ രാഹുൽ മാങ്കൂട്ടത്തിൽ യൂത്ത് കോൺഗ്രസ് സംസ്ഥാന അധ്യക്ഷ സ്ഥാനം രാജി വച്ചിരുന്നു.
രണ്ടാം പ്രതിയായ ജോബി ജോസഫ് അടൂർ സ്വദേശിയാണ്. ഗർഭഛിദ്രം നടത്തിയത് ഗുളിക കഴിച്ചാണെന്നും രാഹുലിന്റെ സുഹൃത്താണ് ഗുളിക എത്തിച്ചു നൽകിയതെന്നും മൊ‍ഴിയിലുണ്ട്. ഗുളിക കഴിച്ചു എന്നത് രാഹുൽ വീഡിയോ കോളിലൂടെ ഉറപ്പാക്കിയതായും മൊഴിയിൽ പറയുന്നു. 2025 മെയ് 30ന് രാഹുലിന്റെ സുഹൃത്ത് തിരുവനന്തപുരം കൈമനത്ത് നിന്നും യുവതിയെ കാറില്‍ കയറ്റി ഗര്‍ഭഛിദ്രത്തിനുള്ള മരുന്ന് നല്‍കുകയായിരുന്നെന്ന് എഫ്‌ഐആറില്‍ (FIR) പറയുന്നു. കാറില്‍ വച്ചാണ് മരുന്ന് നല്‍കിയത്. വീഡിയോ കോൾ ചെയ്ത് മരുന്ന് കഴിച്ചെന്ന് രാഹുല്‍ ഉറപ്പ് വരുത്തിയിരുന്നു.
ഗുളിക കഴിച്ച ശേഷം ഗുരുതര ശാരീരിക പ്രശ്‌നങ്ങളുണ്ടായെന്നും യുവതിയുടെ മൊഴിയിൽ പറയുന്നു. തടർന്ന് ഒരു സർക്കാർ ആശുപത്രിയിലെ ഗൈനക്കോളജിസ്റ്റിനെ കണ്ടു. ആശുപത്രിയെയും ഡോക്റെയും പോലീസ് തിരിച്ചറിഞ്ഞിട്ടുണ്ട്.
