കേരളത്തിലെ വോട്ടർ പട്ടിക പ്രത്യേക തീവ്ര പുനഃപരിശോധന (എസ്ഐആർ) നടപടികള്‍ നിര്‍ത്തി വയ്ക്കണമെന്ന് ആവശ്യപ്പെട്ടുള്ള കേരളത്തിന്റെ ഹര്‍ജിയിൽ സുപ്രീംകോടതി കേന്ദ്ര തെരഞ്ഞെടുപ്പ് കമ്മീഷന്റെ പ്രതികരണം തേടി. ഹര്‍ജി നവംബർ 26 ന് വീണ്ടും പരിഗണിക്കും. കേരളത്തിലെ ഹര്‍ജികള്‍ പ്രത്യേകമായി പരിഗണിക്കുമെന്നാണ് സുപ്രീംകോടതി അറിയിച്ചത്. ഡിസംബർ 9, 11 തീയതികളിലാണ് സംസ്ഥാനത്ത് തദ്ദേശ തെരഞ്ഞെടുപ്പ് നടക്കുന്നത്.
തദ്ദേശ തെരഞ്ഞെടുപ്പ് ആണെന്ന് ഹര്‍ജിക്കാര്‍ ചൂണ്ടിക്കാട്ടിയപ്പോള്‍ കുറച്ചുകൂടി കാത്തിരിക്കൂ എന്നായിരുന്നു കോടതിയുടെ മറുപടി. ജസ്റ്റിസുമാരായ സൂര്യകാന്ത്, എസ്. വി. എൻ. ഭട്ടി, ജോയ്മല്യ ബാഗ്ചി എന്നിവരടങ്ങിയ ബെഞ്ചാണ് ഹര്‍ജികള്‍ പരിഗണിച്ചത്. കേരളത്തിലെ തദ്ദേശ തെരഞ്ഞെടുപ്പ് ഡിസംബർ 21-ന് മുമ്പ് പൂർത്തിയാക്കണം എന്ന ഭരണഘടനാപരമായ സമയപരിധി ചൂണ്ടിക്കാട്ടിയാണ് സർക്കാർ എസ്ഐആർ മാറ്റിവെക്കണമെന്ന് ആവശ്യപ്പെട്ടത്.
തദ്ദേശ തിരഞ്ഞെടുപ്പ് സമയത്ത് തന്നെ എസ്ഐആർ (SIR) നടപടികൾ തുടരുന്നത് ഭരണപരമായ വലിയ പ്രതിസന്ധിക്ക് കാരണമാകുമെന്നാണ് കേരള സർക്കാർ കോടതിയെ അറിയിച്ചത്. തദ്ദേശ തെരഞ്ഞെടുപ്പിനായി 1.76 ലക്ഷം ഉദ്യോഗസ്ഥരെയും സുരക്ഷാ ഉദ്യോഗസ്ഥരെയും വിന്യസിക്കേണ്ടതുണ്ട്. ഇതിനൊപ്പം എസ്ഐആർ കൂടി നടത്താൻ ഏകദേശം 25,668 അധിക ഉദ്യോഗസ്ഥർ ആവശ്യമാണ്. ഒരേ പരിശീലനം ലഭിച്ച ഉദ്യോഗസ്ഥരെ രണ്ട് സുപ്രധാന കാര്യങ്ങൾക്കും ഒരേ സമയം ഉപയോഗിക്കുന്നത് ഭരണപരമായ പ്രവർത്തനങ്ങളെ തടസ്സപ്പെടുത്തുമെന്നും ഹർജിയിൽ ചൂണ്ടിക്കാട്ടുന്നു.
കേരള സർക്കാരിന് വേണ്ടി മുതിർന്ന അഭിഭാഷകൻ കപിൽ സിബൽ കോടതിയിൽ ഹാജരായി.
മറ്റ് ഹർജികളും പരിഗണനയിൽ
എസ്ഐആർ നടപടി മാറ്റിവെക്കാൻ ആവശ്യപ്പെട്ടുള്ള കേരള സർക്കാരിന്റെ ഹർജി കൂടാതെ ഇതിനെ ചോദ്യം ചെയ്ത് നൽകിയ മറ്റ് ഹർജികളിലും കോടതി നോട്ടീസ് അയച്ചു. സിപിഎം, സിപിഐ, മുസ്‌ലീം ലീഗ് എന്നീ രാഷ്‌ടീയ പാർട്ടികളൂം സുപ്രീം കോടതിയെ സമീപിച്ചിരുന്നു.
കേരളത്തിന് പുറമെ, ബിഹാർ, തമിഴ്നാട്, പശ്ചിമ ബംഗാൾ എന്നീ സംസ്ഥാനങ്ങളിലെ എസ്ഐആറിനെ നെ ചോദ്യം ചെയ്തുള്ള ഹർജികളും സുപ്രീം കോടതിയുടെ പരിഗണനയിലാണ്.
