തിരുവനന്തപുരത്തിനും കൊല്ലത്തിനും പിന്നാലെ കൊച്ചി കോര്‍പറേഷനിലും സ്ഥാനാര്‍ഥികളെ പ്രഖ്യാപിക്കാനൊരുങ്ങി യുഡിഎഫ്. കഴിഞ്ഞതവണ ഏറ്റവും വലിയ ഒറ്റക്കക്ഷിയായിട്ടും പ്രതിപക്ഷത്തിരിക്കേണ്ടി വന്ന യുഡിഎഫ് ഇത്തവണ എന്തുവില കൊടുത്തും ഭരണം പിടിക്കാനുള്ള ഗൃഹപാഠവുമായാണ് പ്രതിപക്ഷ നേതാവ് വി ഡി സതീശന്റെ നേതൃത്വത്തില്‍ സ്ഥാനാര്‍ഥി നിര്‍ണയം നടത്തുന്നത്. വിജയസാധ്യത മാത്രം കണക്കിലെടുത്താണ് സ്ഥാനാര്‍ഥി നിര്‍ണയം.
മേയര്‍ സ്ഥാനത്തേക്ക് വനിതയെ പരിഗണിക്കും. പരിചയസമ്പന്നരായ വനിതകള്‍ മത്സരത്തിനുണ്ടാകുമെന്നാണ് വിവരം. ഷൈനി മാത്യു, ദീപ്തി മേരി വര്‍ഗീസ്, അഡ്വ. മിനി മോള്‍, മാലിനി കുറുപ്പ് എന്നിവരാണ് സാധ്യതാ പട്ടികയിലുള്ളത്. 2015-20 കാലഘട്ടത്തില്‍ മേയറായിരുന്നു സൗമിനി ജയിനും രംഗത്തുണ്ട്. ഇവരില്‍ ഷൈനി മാത്യു സര്‍പ്രൈസ് സ്ഥാനാര്‍ഥിയായി വരുമെന്നാണ് സൂചനകള്‍.
ക്രൈസ്തവ സഭയുമായി വളരെ അടുപ്പമുള്ള ഷൈനി മാത്യു, ഒന്നാം വാര്‍ഡായ ഫോര്‍ട്ട് കൊച്ചിയില്‍നിന്നാകും ജനവിധി തേടുക. കോണ്‍ഗ്രസിന്റെ സിറ്റിങ് സീറ്റായ ഇവിടെ നിലവില്‍ ആന്റണി കുരീത്തറയാണ് കൗണ്‍സിലര്‍. ഫോര്‍ട്ട് കൊച്ചി, മട്ടാഞ്ചേരി, പള്ളുരുത്തി, ഇടക്കൊച്ചി, പെരുമ്പടപ്പ് വാര്‍ഡുകള്‍ ഉള്‍പ്പെട്ട പശ്ചിമ കൊച്ചിയില്‍നിന്ന് ഇതുവരെ ഒരു മേയര്‍ ഉണ്ടായിട്ടില്ല.
2015-20 കാലഘട്ടത്തില്‍ ആദ്യ രണ്ടര വര്‍ഷം സൗമിനി ജെയിനും അവസാന രണ്ടര വര്‍ഷം ഷൈനി മാത്യുവും മേയറാകും എന്നായിരുന്നു കോണ്‍ഗ്രസിലെ ധാരണ. എന്നാല്‍ രണ്ടര വര്‍ഷത്തിനുശേഷം മേയര്‍ സ്ഥാനം രാജിവെയ്ക്കാന്‍ സൗമിനി ജെയിന്‍ തയ്യാറായില്ല. മേയര്‍ സ്ഥാനം വീതംവയ്ക്കുന്നതു സംബന്ധിച്ച് പാര്‍ട്ടിയില്‍ കരാറൊന്നുമില്ലെന്നായിരുന്നു അന്ന് സൗമിനി നിലപാടെടുത്തത്. ഇതു പാര്‍ട്ടിക്കുള്ളില്‍ വലിയ പ്രതിസന്ധി സൃഷ്ടിച്ചിരുന്നു.
വോട്ടര്‍ പട്ടികയില്‍ പുതുതായി ചേര്‍ത്ത 31,000 വോട്ടുകളില്‍ 21,000വും കോണ്‍ഗ്രസ് വോട്ടുകളെന്നത് യുഡി്എഫിനു തിരിച്ചുവരില്‍ വന്‍ പ്രതീക്ഷ നല്‍കുന്നു.
മുസ്ലിം സമുദായം പൊതുവെ എല്‍ഡിഎഫുമായി അകന്നതും ക്രിസ്ത്യന്‍ സമുദായവുമായി ഉണ്ടായിരുന്ന അകല്‍ച്ചകള്‍ ഇല്ലാതാക്കാന്‍ കഴിഞ്ഞതും കൊച്ചിയിലും ഗുണം ചെയ്യുമെന്ന പ്രതീക്ഷയിലാണ് കോണ്‍ഗ്രസ്. വഖഫ് പ്രശ്നത്തിലും പള്ളുരുത്തി സ്‌കൂളിലെ പ്രശ്നത്തിലും കെ സി ബി സി അടക്കമുള്ള സംഘടനകളുമായി ചര്‍ച്ച ചെയ്താണ് കോണ്‍ഗ്രസ് നിലപാട് സ്വീകരിച്ചത്. ഇക്കാര്യത്തില്‍ ലീഗ് നേതൃതവത്തിലെ ചിലര്‍ ഭിന്നാഭിപ്രായം പറഞ്ഞെങ്കിലും ഭൂരിപക്ഷം സമവായ ശ്രമങ്ങള്‍ക്ക് അനുക്കൂലമായിരുന്നു ചര്‍ച്ച ചെയ്താണ് നിലപാട് സ്വീകരിച്ചത്.
