കാലങ്ങളായി പലരും അവകാശപ്പെട്ട ആ ക്രെഡിറ്റിന് പിന്നിലെ വ്യക്തിയെ ലോകത്തിന് പരിചയപ്പെടുത്തി മെഗാസ്റ്റാർ മമ്മൂട്ടി. മുഹമ്മദ്‌കുട്ടി എന്നുള്ള യഥാർത്ഥ പേര് മമ്മൂട്ടിയാക്കി ആദ്യം വിളിച്ച മഹാരാജാസ് കോളേജിലെ സഹപാഠിയെയാണ് മമ്മൂട്ടി താൻ പങ്കെടുത്ത ചടങ്ങിൽ വേദിയിലേക്ക് ക്ഷണിച്ചത്.
മലയാള മനോരമ സംഘടിപ്പിച്ച ‘ഹോർത്തൂസ്’ സാഹിത്യോത്സവ വേദിയിലാണ് ഹൃദയസ്പർശിയായ സംഭവം നടന്നത്. “എനിക്കറിയാവുന്ന, എനിക്ക് മമ്മൂട്ടി എന്നു പേരിട്ടയാൾ ദാണ്ടെ…അവിടിരിപ്പുണ്ട്…” എന്ന് പറഞ്ഞുകൊണ്ടാണ് സദസ്സിലുണ്ടായിരുന്ന തന്റെ പഴയ സഹപാഠിയെ മമ്മൂട്ടി വേദിയിലേക്ക് ക്ഷണിച്ചത്.
“അദ്ദേഹത്തിന്റെ പേര് ശശിധരൻ… എടവനക്കാടാണ് വീട്… ഇദ്ദേഹമാണ് എനിക്ക് മമ്മൂട്ടിയെന്നു പേരിട്ടത്,” എന്ന് മമ്മൂട്ടി അദ്ദേഹത്തെ സദസ്സിനു പരിചയപ്പെടുത്തി. നിറഞ്ഞ കയ്യടികളോടെയാണ് സദസ്സ് ഈ വെളിപ്പെടുത്തലിനെ സ്വീകരിച്ചത്.
തനിക്ക് മമ്മൂട്ടി എന്ന പേരിട്ടെന്ന് അവകാശപ്പെട്ട് പലരും രംഗത്തെത്തിയിട്ടുണ്ടെങ്കിലും, യഥാർത്ഥ ആളെ താൻ ഇത്രയും കാലം ഒരു സർപ്രൈസ് എന്ന നിലയിൽ ഒളിപ്പിച്ചു വെച്ചിരിക്കുകയായിരുന്നുവെന്ന് മമ്മൂട്ടി പറഞ്ഞു.
മഹാരാജാസ് കോളേജിൽ പഠിക്കുന്ന കാലത്ത് മുഹമ്മദ് കുട്ടി എന്ന പേര് പറയാൻ മടിച്ച്, പേര് ഒമർ ഷെരീഫ് ആണെന്ന് താൻ എല്ലാവരോടും പറഞ്ഞിരുന്നതായി മമ്മൂട്ടി ഓർത്തു. എല്ലാവരും ഒമറേ എന്ന് വിളിച്ചു കൊണ്ടിരുന്ന സമയത്താണ് ഒരിക്കൽ പോക്കറ്റിൽ നിന്ന് ഐഡന്റിറ്റി കാർഡ് താഴെ വീണത്. അത് എടുത്തു നോക്കിയ ശശിധരൻ, “നിന്റെ പേര് ഒമറെന്നല്ലല്ലോ.. മമ്മൂട്ടിയെന്നല്ലേ?” എന്ന് ചോദിച്ചു. അന്നുമുതലാണ് താൻ സുഹൃത്തുക്കൾക്കിടയിലും പിന്നീട് നിങ്ങൾക്ക് ഇടയിലും ലോകമെമ്പാടും മമ്മൂട്ടി എന്ന പേരിൽ അറിയപ്പെടാൻ തുടങ്ങിയതെന്ന് താരം വെളിപ്പെടുത്തി.
തുടർന്ന് ശശിധരനെ മമ്മൂട്ടി വേദിയിലേക്ക് ക്ഷണിച്ചു. അടുത്തേക്ക് വന്ന ശശിധരൻ അവിശ്വസനീയ മാനസികാവസ്ഥയിലായിരുന്നു. തനിക്ക് മമ്മൂട്ടി എന്ന് പേരിട്ടെന്ന് അവകാശപ്പെട്ട് ചിലർ ലേഖങ്ങൾ എഴുതിയിട്ടുണ്ടെന്നും മമ്മൂട്ടി ചിരിച്ച് കൊണ്ട് പറഞ്ഞു.
നിർമ്മാതാവും മമ്മൂട്ടിയുടെ സന്തത സഹചാരിയുമായ ആന്റോ ജോസഫ് ആണ് ഈ അപൂർവ്വ നിമിഷത്തിന്റെ വിവരങ്ങൾ ഫേസ്ബുക്കിലൂടെ പങ്കുവെച്ചത്. ‘കഥ പറയുമ്പോൾ’ സിനിമയിലെ ക്ലൈമാക്സ് പോലെ വൈകാരികമായ നിമിഷമായിരുന്നു അതെന്ന് അദ്ദേഹം കുറിച്ചു.
