അയത്തുള്ള അലി ഖമേനിയുടെ വിയോഗത്തിന് പിന്നാലെ ഇറാനെ ഇനി ആര് നയിക്കും എന്നതിനെക്കുറിച്ചുള്ള ചർച്ചകൾ ആഗോളതലത്തിൽ സജീവമാണ്. ഏകദേശം നാല് പതിറ്റാണ്ടോളം ഇറാന്റെ പരമാധികാരിയായിരുന്ന ഖമേനിയുടെ വിടവ് നികത്തുക എന്നത് അവിടുത്തെ ഭരണകൂടത്തിന് വലിയൊരു വെല്ലുവിളിയാണ്. അൽ ജസീറ റിപ്പോർട്ട് ചെയ്യുന്നതനുസരിച്ച്, പുതിയ പരമോന്നത നേതാവിനെ തിരഞ്ഞെടുക്കുന്നത് വരെയുള്ള ഇടക്കാല ഭരണത്തിനായി മൂന്നംഗ കൗൺസിൽ നിലവിൽ വന്നുകഴിഞ്ഞു.
ഇറാൻ ഭരണഘടനയുടെ 111-ാം അനുച്ഛേദം അനുസരിച്ച്, പരമോന്നത നേതാവിന്റെ അഭാവത്തിൽ ഒരു താൽക്കാലിക കൗൺസിലിന് ഭരണച്ചുമതല കൈമാറാം. നിലവിൽ പ്രസിഡന്റ് മസൂദ് പെസെഷ്കിയാൻ, സുപ്രീം കോടതി ചീഫ് ജസ്റ്റിസ് ഗുലാം ഹുസൈൻ മൊഹ്സെനി-എജൈ, ഗാർഡിയൻ കൗൺസിൽ അംഗമായ ആയത്തുള്ള അലിരേസ അറാഫി എന്നിവരടങ്ങിയ സമിതിയാണ് ഭരണകാര്യങ്ങൾ നിയന്ത്രിക്കുന്നത്. 88 അംഗങ്ങളുള്ള ‘അസംബ്ലി ഓഫ് എക്സ്പെർട്സ്’ (വിദഗ്ധ സമിതി) ആണ് അടുത്ത പരമോന്നത നേതാവിനെ ഔദ്യോഗികമായി തിരഞ്ഞെടുക്കേണ്ടത്.
ഖമേനിയുടെ പിൻഗാമിയാകാൻ സാധ്യതയുള്ളവർ
മോജ്തബ ഖമേനി: അലി ഖമേനിയുടെ രണ്ടാമത്തെ മകനായ ഇദ്ദേഹത്തിന് ഇറാന്റെ ഭരണസംവിധാനത്തിലും റെവല്യൂഷണറി ഗാർഡിലും (IRGC) വലിയ സ്വാധീനമുണ്ട്. എന്നാൽ, ഇസ്ലാമിക വിപ്ലവത്തിന് ശേഷം രാജവംശ വാഴ്ചയെ എതിർക്കുന്ന ഇറാനിൽ, പിതാവിന് ശേഷം മകൻ അധികാരത്തിൽ വരുന്നത് വലിയ രാഷ്ട്രീയ ചർച്ചകൾക്ക് വഴിവെച്ചേക്കാം.
ആയത്തുള്ള അലിരേസ അറാഫി: നിലവിൽ ഇടക്കാല കൗൺസിലിൽ അംഗമായ അറാഫി, ഇറാന്റെ മതപാഠശാലകളുടെ തലവനും ഖോമിലെ വെള്ളിിയാഴ്ച പ്രാർത്ഥനാ നേതാവുമാണ്. മതപരമായ പാണ്ഡിത്യവും ഭരണകൂടവുമായുള്ള അടുത്ത ബന്ധവും ഇദ്ദേഹത്തിന് മുൻതൂക്കം നൽകുന്നു.
ഗുലാം ഹുസൈൻ മൊഹ്സെനി-എജൈ: നിലവിലെ ചീഫ് ജസ്റ്റിസായ ഇദ്ദേഹം ഒരു തീവ്ര യാഥാസ്ഥിതിക നേതാവായാണ് അറിയപ്പെടുന്നത്. ഇന്റലിജൻസ് മന്ത്രിയായും പ്രോസിക്യൂട്ടർ ജനറലായും സേവനമനുഷ്ഠിച്ചിട്ടുള്ള ഇദ്ദേഹത്തിന് സുരക്ഷാ കാര്യങ്ങളിൽ വലിയ പരിചയസമ്പത്തുണ്ട്.
ഹസ്സൻ ഖൊമേനി: ഇസ്ലാമിക വിപ്ലവത്തിന്റെ പിതാവ് ആയത്തുള്ള റൂഹുള്ള ഖൊമേനിയുടെ പേരക്കുട്ടിയാണ് ഇദ്ദേഹം. പരിഷ്കരണവാദിയായ ഹസ്സൻ ഖൊമേനിക്ക് ജനങ്ങൾക്കിടയിൽ സ്വാധീനമുണ്ടെങ്കിലും, ഗാർഡിയൻ കൗൺസിൽ പോലുള്ള തീവ്ര നിലപാടുള്ള സമിതികൾ ഇദ്ദേഹത്തെ അംഗീകരിക്കുമോ എന്നത് സംശയമാണ്.
മുഹമ്മദ് മെഹ്ദി മിർബഗേരി: പടിഞ്ഞാറൻ വിരുദ്ധ നിലപാടുകൾക്ക് പേരുകേട്ട ഇദ്ദേഹം ഒരു തീവ്ര യാഥാസ്ഥിതിക പണ്ഡിതനാണ്. വിപ്ലവ ആശയങ്ങളിൽ ഉറച്ചുനിൽക്കുന്ന ഒരാളെയാണ് അസംബ്ലി ഓഫ് എക്സ്പെർട്സ് തിരയുന്നതെങ്കിൽ മിർബഗേരിക്ക് സാധ്യതയുണ്ട്.വെല്ലുവിളികൾ
അമേരിക്കയുടെയും ഇസ്രായേലിന്റെയും ആക്രമണങ്ങൾക്കിടയിൽ ഇറാന്റെ നേതൃമാറ്റം നടക്കുന്നത് അതീവ ഗൗരവകരമായ സാഹചര്യത്തിലാണ്. കേവലം ഒരു വ്യക്തിയെ കണ്ടെത്തുക എന്നതിലുപരി, വിപ്ലവാനന്തര ഇറാൻ കെട്ടിപ്പടുത്ത ഭരണകൂട സംവിധാനത്തെയും സൈനിക വിഭാഗങ്ങളെയും ഒന്നിപ്പിച്ചു കൊണ്ടുപോകാൻ കഴിയുന്ന ഒരാളായിരിക്കണം അടുത്ത നേതാവ്. പുതിയ നേതാവിനെ തിരഞ്ഞെടുക്കുന്ന പ്രക്രിയ വരും ദിവസങ്ങളിൽ ഇറാന്റെ രാഷ്ട്രീയ ഭാവിയും പശ്ചിമേഷ്യയിലെ ശക്തിസമവാക്യങ്ങളും നിർണ്ണയിക്കുന്നതിൽ നിർണ്ണായകമാകും.
