ബോംബ് നിര്‍മ്മാണത്തിനിടെ കൊല്ലപ്പെട്ട ഷെറിനും ഡിവൈഎഫ്‌ഐക്ക് രക്തസാക്ഷിയായി മാറിയെന്ന് യൂത്ത് കോണ്‍ഗ്രസ് സംസ്ഥാന പ്രസിഡന്റ് ഒ.ജെ ജെനീഷ്. ഡിസിസിയില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. ഷെറിനൊപ്പം ഉള്ള ഫോട്ടോ പുറത്ത് വന്നപ്പോള്‍ അതിനെ കെ.കെ.ശൈലജ ടീച്ചര്‍ തള്ളിപ്പറഞ്ഞിരുന്നു. ഇപ്പോള്‍ അതിനെ കുറിച്ചുള്ള നിലപാട് എന്താണെന്നും ജെനീഷ് ചോദിച്ചു.
ഒരു യുവജന സംഘടനയെ സംബന്ധിച്ച് ബോംബ് ഉണ്ടാക്കുന്നത് രാഷ്ട്രീയ പ്രത്യായശാസ്ത്രത്തിന്റെ ഭാഗമാകേണ്ട കാര്യമില്ല. ബോംബ് ഉണ്ടാക്കുന്നത് ക്രിമിനലുകളാണ്. അത്തരക്കാര്‍ രക്തസാക്ഷികളാണെന്ന് പറയുമ്പോള്‍ പൊലീസ് കേസെടുക്കേണ്ടത് യൂത്ത് കോണ്‍ഗ്രസുകാര്‍ക്കെതിരെയല്ലെന്നും ജെനീഷ് വിമര്‍ശിച്ചു. പേരാമ്പ്രയില്‍ യുഡിഎഫ് സമരത്തിന് മുറുവശത്ത് മാരകായുധങ്ങളുമായി സിപിഎം പ്രവര്‍ത്തകര്‍ തമ്പടിച്ചെന്ന് പൊലീസ് പറഞ്ഞപ്പോഴും അവര്‍ക്ക് നേരെയല്ല ലാത്തിചാര്‍്ജ്ജ് നടത്തിയത്. സമരങ്ങളെ അടിച്ചമര്‍ത്തുകയാണ് പൊലീസ്. വി.പി.ദുല്‍കിഫിലിനെതിരെ ചുമത്തിയത് കള്ളക്കേസാണ്. പൊലീസ് നടപടിക്ക് പിന്നിലെ രാഷ്ട്രീയ താത്പര്യം എന്താണ് എന്ന് വ്യക്തമാക്കണമെന്ന് അദ്ദേഹം ആവശ്യപ്പെട്ടു.
പേരാമ്പ്രയിലെ പോലെ ഫ്രഷ് കട്ട് സമരത്തില്‍ പൊലീസ് മേധാവി കടന്നു ചെന്നപ്പോഴാണ് ക്രൂരമായ അക്രമം നടന്നത്. പദേശത്ത് സ്ത്രീകള്‍ക്കെതിരെ പോലും പൊലീസ് അതിക്രമം ഉണ്ടാകുന്നു. കുട്ടികളെ പോലും വഴിയില്‍ തടഞ്ഞു നിര്‍ത്തുകയാണ് പൊലീസ്. എസ്.പി.ബൈജുവിന് പരിക്ക് പറ്റിയത് സ്ട്രക്ച്ചര്‍ മുഖത്ത് കൊണ്ടാണെന്നും ജനങ്ങള്‍ അക്രമം നടത്തിയിട്ടല്ലെന്നും ജെനീഷ് പറഞ്ഞു. യൂണിഫോം ധരിക്കുമ്പോള്‍ എതിരില്‍ കാണുന്ന ജനങ്ങളെ റൂറല്‍ എസ്.പിക്ക് ശത്രുക്കളായി കാണുന്നു. കെ.ഇ.ബൈജു നിരന്തരമായി പ്രശ്‌നങ്ങളുണ്ടാക്കുകയാണ്. ഫ്രഷ് കട്ടിനെതിരെ രാഷ്ട്രീയത്തിന് അതീതമായി പ്രദേശവാസികളെ അണിനിരത്തി ജനകീയ സമരത്തിന് നേതൃത്വം നല്‍കും. ഫ്രഷ് കട്ടിനെതിരെ നാട്ടുകാര്‍ നടക്കുന്നത് ന്യായമായ സമരമാണെന്നും യൂത്ത് കോണ്‍ഗ്രസ് സമരസമിതിക്കൊപ്പമാണെന്നും ജെനീഷ് വ്യക്തമാക്കി.
തദ്ദേശ തിരഞ്ഞെടുപ്പില്‍ എല്ലായിടത്തും സര്‍പ്രൈസ് സ്ഥാനാര്‍ഥികള്‍ ഉണ്ടാകും. കോഴിക്കോട്ടും കണ്ണൂരിലും തൃശ്ശൂരിലും സര്‍പ്രൈസ് ഉണ്ടാകും. മലബാറില്‍ നിന്ന് തുടങ്ങുന്ന കോണ്‍ഗ്രസിന്റെ തേരോട്ടം തന്നെയായിരിക്കും 2026ലെ യുഡിഎഫ് സര്‍ക്കാരിലേക്ക് നയിക്കാന്‍ പോകുന്ന സാഹചര്യം ഉണ്ടാക്കുന്നതെന്നും കൂട്ടിചേര്‍ത്തൂ. വാര്‍ത്താസമ്മേളനത്തില്‍ വര്‍ക്കിങ് പ്രസിഡന്റ് ബിനു ചുള്ളിയില്‍, കെഎസ്‌യു ജില്ല പ്രസിഡന്റ് ആര്‍ ഷെഹിന്‍, സംസ്ഥാന ഭാരവാഹി വൈശാഖ് കണ്ണോറ എന്നിവര്‍ പങ്കെടുത്തു.
വയനാട് ദുരന്തബാധിതര്‍ക്കുള്ള വീട് നിര്‍മ്മാണം ഉടന്‍ ആരംഭിക്കും : ഒ.ജെ ജെനീഷ്
കോഴിക്കോട്: വയനാട് ഉരുള്‍പൊട്ടല്‍ ദുരന്തബാധിതര്‍ക്കുളള ഭവന നിര്‍മ്മാണം ഉടന്‍ ആരംഭിക്കുമെന്ന് യൂത്ത് കോണ്‍ഗ്രസ് സംസ്ഥാന പ്രസിഡന്റ് ഒ.ജെ ജെനീഷ്. ഡിസിസിയില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം. ഭൂമി ഏറ്റെടുത്താല്‍ ഉടന്‍ തന്നെ പ്രവൃത്തിയും ആരംഭിക്കും. തോട്ടം ഭൂമിയെന്നതിനാല്‍ സ്‌പോണ്‍സര്‍ ചെയ്യപ്പെട്ട സ്ഥലങ്ങളില്‍ പോലും നിര്‍മ്മാണത്തിന് അനുവാദം ലഭിക്കാത്ത അവസ്ഥയുണ്ട്. സന്നദ്ധ സംഘടനകള്‍ വീട് നിര്‍മ്മിച്ച് നല്‍കാന്‍ സമീപിക്കുമ്പോള്‍ നിയമപരമായ നൂലാമാലകള്‍ ഒഴിവാക്കി നല്‍കേണ്ടത് സര്‍ക്കാരിന്റെ കടമയാണ്. എന്നാല്‍ സര്‍ക്കാര്‍ പ്രഖ്യാപിച്ച വീടുകള്‍ പൂര്‍ത്തിയാകും മുന്നേ യൂത്ത് കോണ്‍ഗ്രസിന്റെ വീട് നിര്‍മ്മാണം പൂര്‍ത്തിയാവരുതെന്ന നിര്‍ബന്ധം ഇതിന് പിന്നിലുണ്ടോയെന്ന സംശയിക്കുകയാണെന്നും ജെനീഷ് പറഞ്ഞു. വീട് നിര്‍മ്മാണം പ്രഖ്യാപിച്ചത് പോലെ നടപ്പാക്കുമെന്നും മറ്റു പ്രചരണങ്ങളെല്ലാം സിപിഎം സൃഷ്ടിയാണെന്നും അദ്ദേഹം പറഞ്ഞു.
