കർണാടക കോൺഗ്രസിലെ നേതൃത്വ തർക്കങ്ങൾ തുടരുന്നതിനിടെ, അനുരഞ്ജന നീക്കവുമായി മുഖ്യമന്ത്രി സിദ്ധരാമയ്യ. ഉപമുഖ്യമന്ത്രി ഡി കെ ശിവകുമാറിനെ പ്രഭാതഭക്ഷണത്തിനായി ക്ഷണിച്ചു. പ്രശ്നങ്ങൾ നേരിട്ട് സംസാരിച്ച് പരിഹരിക്കാൻ കോൺഗ്രസ് ഹൈക്കമാൻഡ് നൽകിയ കർശന നിർദ്ദേശത്തെത്തുടർന്നാണ് ഈ നീക്കം.
ശരിയായ സമയത്ത് പാർട്ടി നേതൃത്വം വിഷയത്തിൽ ഇടപെടാൻ കാത്തിരിക്കുകയാണെന്ന് മുതിർന്ന നേതാക്കൾ വ്യക്തമാക്കുന്നതിനിടയിലാണ് ഇരുവരുടെയും കൂടിക്കാഴ്ച നടക്കുന്നത്. പാർട്ടി നേതൃത്വത്തിന്റെ നിർദ്ദേശപ്രകാരമാണ് കൂടിക്കാഴ്ചയെന്ന് സിദ്ധരാമയ്യ മാധ്യമങ്ങളോട് പറഞ്ഞു. “പാർട്ടി ഹൈക്കമാൻഡ് എന്നെയും അദ്ദേഹത്തെയും വിളിച്ച് ഒരു കൂടിക്കാഴ്ച നടത്താൻ ആവശ്യപ്പെട്ടിരുന്നു. അതുകൊണ്ടാണ് പ്രഭാതഭക്ഷണത്തിന് അദ്ദേഹത്തെ ക്ഷണിച്ചത്,” സിദ്ധരാമയ്യ പറഞ്ഞു.
തന്റെ നിലപാടിൽ മാറ്റമില്ലെന്നും, പാർട്ടി ഹൈക്കമാൻഡ് എന്ത് പറഞ്ഞാലും അനുസരിക്കുമെന്നും അദ്ദേഹം വ്യക്തമാക്കി. ഹൈക്കമാൻഡ് ആവശ്യപ്പെട്ടാൽ ഡൽഹിയിലേക്ക് പോകുമെന്നും അദ്ദേഹം കൂട്ടിച്ചേർത്തു.
അതേസമയം, ഉപമുഖ്യമന്ത്രിയും കെ.പി.സി.സി അധ്യക്ഷനുമായ ഡി.കെ. ശിവകുമാർ ഒത്തുതീർപ്പിന്റെ സൂചനകളാണ് നൽകുന്നത്. “എനിക്ക് ഒന്നും വേണ്ട. എനിക്ക് യാതൊരു തിടുക്കവുമില്ല. എന്റെ പാർട്ടി തീരുമാനമെടുക്കും,” അദ്ദേഹം പ്രതികരിച്ചു. പാർലമെന്റിന്റെ ശീതകാല സമ്മേളനത്തിന് മുന്നോടിയായി താൻ ഡൽഹിയിലേക്ക് പോയേക്കുമെന്നും അദ്ദേഹം പറഞ്ഞു. ഹൈക്കമാൻഡിനെ കാണുമോ എന്ന ചോദ്യത്തിന്, “ഡൽഹി നമ്മുടെ ക്ഷേത്രമാണ്. നമ്മളെല്ലാവരും അവിടെ പോകണം. ഡൽഹിയില്ലാതെ ഒന്നും നടക്കില്ല,” എന്നായിരുന്നു അദ്ദേഹത്തിന്റെ മറുപടി.
ഹൈക്കമാൻഡിന്റെ കണക്കുകൂട്ടൽ ഉചിതമായ സമയത്ത് ഉണ്ടാകുമെന്ന് മന്ത്രി പ്രിയങ്ക് ഖാർഗെ പറഞ്ഞു. “ഹൈക്കമാൻഡിന് സമയത്തെക്കുറിച്ച് കൃത്യമായ ധാരണയുണ്ട്. ശരിയായ സമയം നോക്കി അവർ തീരുമാനമെടുക്കും,” അദ്ദേഹം വ്യക്തമാക്കി.
രണ്ടര വർഷത്തിന് ശേഷം മുഖ്യമന്ത്രി സ്ഥാനം വച്ചുമാറുമെന്ന അഭ്യൂഹങ്ങൾ സിദ്ധരാമയ്യയുടെ മകൻ യതീന്ദ്ര തള്ളി. പാർട്ടിയിൽ ആഭ്യന്തര കലാപമില്ലെന്നും മാധ്യമങ്ങൾ തെറ്റിദ്ധാരണ പരത്തുകയാണെന്നും അദ്ദേഹം പറഞ്ഞു. നേതൃമാറ്റത്തെക്കുറിച്ച് എന്തെങ്കിലും വാഗ്ദാനം നൽകിയിട്ടുണ്ടോ എന്ന് ആർക്കും അറിയില്ലെന്നും അതിനാൽ ഊഹാപോഹങ്ങൾ ശരിയല്ലെന്നും അദ്ദേഹം കൂട്ടിച്ചേർത്തു.
ആഴ്ചകളായി തുടരുന്ന രാഷ്ട്രീയ തർക്കങ്ങൾക്ക് ശേഷം സിദ്ധരാമയ്യയും ശിവകുമാറും തമ്മിൽ നടക്കുന്ന ആദ്യത്തെ കൂടിക്കാഴ്ചയാകും ഇന്നത്തെ പ്രഭാതഭക്ഷണം.
