പശ്ചിമേഷ്യയിൽ ഇറാനെതിരായ അമേരിക്ക-ഇസ്രായേൽ സൈനിക നീക്കങ്ങൾക്കെതിരെ കർഷകരുടെ നേതൃത്വത്തിൽ പഞ്ചാബിൽ വ്യാപക പ്രതിഷേധം. കഴിഞ്ഞ ദിവസം ബർണാലയിൽ നടന്ന കൂറ്റൻ റാലിയിൽ പതിനായിരക്കണക്കിന് കർഷകർ ഇറാൻ ജനതയ്ക്ക് ഐക്യദാർഢ്യം പ്രഖ്യാപിച്ചു. പശ്ചിമേഷ്യയിലെ സംഘർഷം ഇന്ത്യയിലെ, പ്രത്യേകിച്ച് പഞ്ചാബിലെ സാധാരണക്കാരായ കർഷകരുടെ ജീവിതത്തെ നേരിട്ട് ബാധിക്കുന്ന ഒന്നാണെന്നും കർഷക നേതാക്കൾ മുന്നറിയിപ്പ് നൽകി.
ഇറാൻ പരമോന്നത നേതാവിന്റെ വധത്തെത്തുടർന്നുണ്ടായ സാഹചര്യങ്ങളെ പഞ്ചാബിലെ രാഷ്ട്രീയ-സാമൂഹിക നേതൃത്വം ഒന്നടങ്കം അപലപിച്ചു. മർദ്ദിതർക്കൊപ്പം നിൽക്കുക എന്നത് സിഖ് മതവിശ്വാസത്തിന്റെ ഭാഗമാണെന്നും ജാതിയോ മതമോ നോക്കാതെ നീതിക്ക് വേണ്ടി നിലകൊള്ളുന്ന പഞ്ചാബിന്റെ സഹജമായ പ്രതികരണമാണിതെന്നുമാണ് ചരിത്രകാരന്മാരും മതനേതാക്കളും ചൂണ്ടിക്കാണിക്കുന്നത്.
യുദ്ധം മൂലം ക്രൂഡ് ഓയിൽ വിതരണം തടസ്സപ്പെടുന്നത് ഡീസൽ, പെട്രോൾ വില കുത്തനെ ഉയരാൻ കാരണമാകും. ട്രാക്ടറുകളും മറ്റ് യന്ത്രങ്ങളും പ്രവർത്തിപ്പിക്കാൻ ഇന്ധനത്തെ ആശ്രയിക്കുന്ന കർഷകർക്ക് ഇത് താങ്ങാനാവാത്ത ബാധ്യതയാകുമെന്ന് റാലിയിൽ കർഷകർ ചൂണ്ടിക്കാട്ടി. ഇന്ത്യയിൽ നിന്നുള്ള ബാസ്മതി അരിയുടെ 40 ശതമാനവും വിദേശത്തേക്ക് കയറ്റി അയക്കുന്നത് ഇറാൻ ഉൾപ്പെടെയുള്ള രാജ്യങ്ങളിലേക്കാണ്. കപ്പൽ ഗതാഗതം തടസ്സപ്പെടുന്നത് പഞ്ചാബിലെ നെൽകർഷകരുടെ വിപണിയെ തകർക്കും.
അമേരിക്കയുമായുള്ള പുതിയ വ്യാപാര കരാർ ഇന്ത്യൻ കാർഷിക മേഖലയ്ക്ക് തിരിച്ചടിയാണെന്ന് ഭാരതീയ കിസാൻ യൂണിയൻ (ഡകൗണ്ട) കുറ്റപ്പെടുത്തി. അമേരിക്കൻ കാർഷിക ഉൽപ്പന്നങ്ങൾ കുറഞ്ഞ നിരക്കിൽ ഇന്ത്യൻ വിപണിയിൽ എത്തുന്നതോടെ തദ്ദേശീയ കർഷകർക്ക് അർഹമായ വില ലഭിക്കില്ലെന്ന് അവർ ഭയപ്പെടുന്നു. മധ്യേഷ്യയിൽ കുടുങ്ങിക്കിടക്കുന്ന ഇന്ത്യക്കാരുടെ സുരക്ഷ ഉറപ്പാക്കണമെന്നും അമേരിക്കയുടെയും ഇസ്രായേലിന്റെയും ആക്രമണോത്സുകമായ വിദേശനയത്തിനെതിരെ കേന്ദ്ര സർക്കാർ ശക്തമായ നിലപാട് സ്വീകരിക്കണമെന്നും റാലിയിൽ ആവശ്യപ്പെട്ടു.
റഷ്യയിൽ നിന്നുള്ള എണ്ണ ഇറക്കുമതി നിർത്തിവെക്കാൻ അമേരിക്ക ഇന്ത്യക്ക് മേൽ സമ്മർദ്ദം ചെലുത്തുന്നതിനെതിരെയും കർഷക നേതാക്കൾ രൂക്ഷമായി പ്രതികരിച്ചു.
