അരൂര്‍-തുറവൂര്‍ ഉയരപ്പാത നിര്‍മ്മാണ മേഖലയില്‍ ഗര്‍ഡര്‍ പിക്കപ്പ് വാനിന് മുകളില്‍ വീണ് ഡ്രൈവര്‍ മരിക്കാനിടയായ സംഭവം വേദനയുണ്ടാക്കുന്നതാണെന്ന് എഐസിസി ജനറൽ സെക്രട്ടറി കെ സി വേണുഗോപാൽ.
ദേശീയപാത നിര്‍മ്മാണവുമായി ബന്ധപ്പെട്ട് ആവശ്യമായ സുരക്ഷാ ക്രമീകരണം ഒരുക്കാതെയും സര്‍വീസ് റോഡുകള്‍ മെച്ചപ്പെടുത്താതെയും കേന്ദ്ര-സംസ്ഥാന സര്‍ക്കാരുകള്‍ ജനങ്ങളെ കൊലയ്ക്ക് കൊടുക്കുകയാണെന്ന് വേണുഗോപാൽ തിരുവനന്തപുരത്ത് മാധ്യമങ്ങളോട് പറഞ്ഞു.
അശാസ്ത്രീയമായ രീതിയിലാണ് കേരളത്തില്‍ പലയിടത്തും ദേശീയപാത നിര്‍മ്മാണം നടക്കുന്നത്. അരൂര്‍ തുറവൂര്‍ ഭാഗത്ത് മാത്രം നാല്‍പ്പതോളം പേരാണ് സര്‍വീസ് റോഡിന്റെ ശോചനീയാവസ്ഥ കാരണം അപകടത്തില്‍ മരിച്ചത്. യാത്രക്കാര്‍ക്ക് ഒരു സുരക്ഷയും ഉറപ്പാക്കാതെ എങ്ങനെയും മേല്‍പ്പാത നിര്‍മ്മാണം പൂര്‍ത്തിയാക്കുക മാത്രമാണ് സര്‍ക്കാരിന്റെ ലക്ഷ്യം.
സര്‍വീസ് റോഡുകളുടെ കാര്യത്തില്‍ സംസ്ഥാന സര്‍ക്കാരും കുറ്റക്കാരാണ്. ഇവയുടെ പണികള്‍ പൂര്‍ത്തിയാക്കി സഞ്ചാരയോഗ്യമാക്കാന്‍ ഒരു വര്‍ഷം മുമ്പ് തന്നെ എന്‍എച്ച്എഐ (National Highways Authority of India) എട്ട് കോടി രൂപ നല്‍കിയിട്ടും ഇതുവരെ ഒന്നും ചെയ്തില്ല. അപകടകരമായ സാഹചര്യത്തില്‍ ഉയരപ്പാത നിര്‍മ്മാണം നടക്കുമ്പോള്‍ ഗതാഗതം നിയന്ത്രിക്കുന്നതിന് സൈന്‍ ബോര്‍ഡ് സ്ഥാപിക്കണമെന്ന നിര്‍ദ്ദേശം പോലും നടപ്പാക്കിയില്ല. എന്താണ് ഇവരുടെ മുന്‍ഗണനയെന്ന് മനസിലാകുന്നില്ല. മനുഷ്യജീവന് ഒരു വിലയും കല്‍പ്പിക്കാത്ത സമീപനം തിരുത്തണമെന്ന് ദേശീയപാത അതോറിറ്റിയോടും കേന്ദ്രസര്‍ക്കാരിനോടും ആവശ്യപ്പെട്ടതാണ്. നിരവധി തവണ കത്തുകള്‍ നല്‍കി.
ഇത്തരം ഒരു അപകടം ഏത് നിമിഷവും സംഭവിക്കുമെന്ന ഭയമുണ്ടായിരുന്നു. അപകടസാധ്യത പലതവണ കേന്ദ്രസര്‍ക്കാരിന്റെ ശ്രദ്ധയില്‍പ്പെടുത്തിട്ടുണ്ട്. അരൂര്‍ -തുറവൂര്‍ ഭാഗത്തെ സുരക്ഷാപ്രശ്‌നത്തിന് പരിഹാരം ഉണ്ടാക്കാന്‍ നിരവധി തവണയാണ് ആലപ്പുഴ കളക്ട്രേറ്റില്‍ ചേര്‍ന്ന യോഗത്തില്‍ നിര്‍ദ്ദേശം നല്‍കിയത്. പബ്ലിക്ക് അക്കൗണ്ട്സ് കമ്മിറ്റി നേരിട്ട് ഇവിടെത്തെ സ്ഥലം സന്ദര്‍ശിച്ച് സ്ഥിതിഗതികള്‍ വിലയിരുത്തിയിരുന്നതുമാണ്.
ഇനിയും ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ കേന്ദ്ര-സംസ്ഥാന സര്‍ക്കാരുകള്‍ നടപടി സ്വീകരിക്കണം. അരൂര്‍-തുറവൂര്‍ ഭാഗത്തെ ജനങ്ങളുടെ ദുരിതം വീണ്ടും കേന്ദ്ര മന്ത്രിയുടെ ശ്രദ്ധയില്‍പ്പെടുത്തും. ജനങ്ങളുടെ സുരക്ഷ പ്രധാനഘടകമാണ്. അതിനായി ഗൗരവതരമായ ഇടപെടല്‍ നടത്തുമെന്നും വേണുഗോപാൽ പറഞ്ഞു.
വ്യാഴാഴ്ച പുലര്‍ത്തെ 2.30-ഓടെയാണ് ദാരുണമായ അപകടം ഉണ്ടായത്. തുറവൂര്‍ ഉയരപ്പാത നിര്‍മാണം നടക്കുന്ന എരമല്ലൂരില്‍ ടോള്‍ പ്ലാസ വരുന്ന ഭാഗത്ത് ഗര്‍ഡറുകള്‍ സ്ഥാപിക്കുമ്പോള്‍ ജാക്കിയില്‍നിന്ന് തെന്നിമാറി താഴേക്ക് വീണാണ് അപകടമുണ്ടായത്. റോഡിലൂടെ പോകുകയായിരുന്ന പിക്കപ്പ് വാനിന്‍റെ മുകളിലേക്കാണ് ഇത് പതിച്ചത്. അപകടത്തിൽ ഡ്രൈവർ രാജേഷ് മരിച്ചു.
സംഭവത്തിൽ പോലീസ് നരഹത്യക്ക് കേസെടുത്തു. നിര്‍മാണ കമ്പനിയുടെ ജീവനക്കാരെ പ്രതിയാക്കിയാണ് പോലീസ് എഫ്‌ഐആര്‍ രജിസ്റ്റര്‍ ചെയ്തിരിക്കുന്നത്. കരാര്‍ കമ്പനിക്ക് ഗുരുതരമായ വീഴ്ച സംഭവിച്ചിട്ടുണ്ടെന്നാണ് എഫ്‌ഐആറില്‍ വ്യക്തമാക്കിയിട്ടുള്ളത്. ഭാരതീയ ന്യായസംഹിതയിലെ 105-ാം വകുപ്പ് പ്രകാരം കുറ്റകരമായ നരഹത്യയാണ് ചുമത്തിയിട്ടുള്ളത്. ഇത് ജാമ്യമില്ലാത്ത വകുപ്പായതുകൊണ്ട് അറസ്റ്റിലായാല്‍ പ്രതികള്‍ റിമാന്‍ഡിലാകും. കൂടുതല്‍ ചോദ്യംചെയ്യലിനായി പോലീസിന് ഇവരെ കസ്റ്റഡിയില്‍ വാങ്ങാം.
