ജമ്മു കാശ്മീർ ശ്രീനഗറിലെ നൗഗാം പോലീസ് സ്റ്റേഷനിൽ ഫരീദാബാദിൽ നിന്ന് പിടിച്ചെടുത്ത സ്ഫോടകവസ്തുക്കൾ പൊട്ടിത്തെറിച്ചുണ്ടായ അപകടത്തിൽ ഒമ്പത് പേർ കൊല്ലപ്പെടുകയും 29 പേർക്ക് പരിക്കേൽക്കുകയും ചെയ്തു. പോലീസ് ഉദ്യോഗസ്ഥരും ഫോറൻസിക് വിദഗ്ധരും ചേർന്ന് സ്റ്റേഷനിൽ സൂക്ഷിച്ചിരുന്ന സ്ഫോടക വസ്തുക്കൾ പരിശോധിക്കുന്നതിനിടെയാണ് വെള്ളിയാഴ്ച രാത്രി വൈകി ശക്തമായ സ്ഫോടനമുണ്ടായത്.
24 പോലീസുകാർ ഉൾപ്പെടെ കുറഞ്ഞത് 29 പേർക്ക് പരി ക്കേറ്റതായാണ് പ്രാഥമിക വിവരങ്ങൾ. സ്ഫോടനത്തിന്റെ ആഘാതത്തിൽ പോലീസ് സ്റ്റേഷൻ കെട്ടിടത്തിനും കാര്യമായ നാശനഷ്ടം ഉണ്ടായി. പോലീസ് സ്റ്റേഷനടുത്തുള്ള വീടുകളും തകർന്നിട്ടുണ്ട്. സ്ഫോടനം നടത്തി എന്ന് അവകാശപ്പെട്ട് ജയ്ഷെ മുഹമ്മദിന്റെ നിഴൽ സംഘടന രംഗത്ത് വന്നിട്ടുണ്ട്. ശ്രീനഗറിന്റെ പ്രാന്തപ്രദേശത്തുള്ള സ്ഥലമാണ് നൗഗാം.
ഒരു ഭീകര മൊഡ്യൂളുമായി ബന്ധപ്പെട്ട് ഹരിയാനയിലെ ഫരീദാബാദിൽ നിന്ന് പിടിച്ചെടുത്ത സ്ഫോടക ശേഖരത്തിലെ വസ്തുക്കളാണ് പൊട്ടിത്തെറിച്ചത്. ജയ്ഷ്-ഇ-മുഹമ്മദ്, അൻസാർ ഗസ്‌വത്ത്-ഉൽ-ഹിന്ദ് എന്നിവയുമായി ബന്ധമുള്ള വൈറ്റ് കോളർ ഭീകര മൊഡ്യൂളിനെ കുറിച്ചുള്ള അന്വേഷണത്തിനിടെയാണ് വൻ സ്ഫോടക ശേഖരം കണ്ടെത്തിയത്. അറസ്റ്റിലായ ഡോക്ടർ മുസമ്മിൽ ഗനായിയുടെ വാടക വീട്ടിൽ നിന്ന് അമോണിയം നൈട്രേറ്റ്, പൊട്ടാസ്യം നൈട്രേറ്റ്, സൾഫർ തുടങ്ങി 360 കിലോഗ്രാം രാസവസ്തുക്കളും ബോംബ് നിർമ്മാണ ഉപകരണങ്ങളും ഉൾപ്പെടെ 2,900 കിലോഗ്രാം സ്ഫോടകവസ്തുക്കൾ അന്വേഷണ സംഘം പിടിച്ചെടുത്തിരുന്നു.
ഒക്ടോബർ പകുതിയോടെ നൗഗാമിൽ സുരക്ഷാ സേനയെ ഭീഷണിപ്പെടുത്തിക്കൊണ്ടുള്ള പോസ്റ്ററുകൾ കണ്ടതിനെ തുടർന്ന് ആരംഭിച്ച അന്വേഷണമാണ് ഭീകര ശൃംഖലയെ പുറത്തുകൊണ്ടുവന്നത്. സിസിടിവി ദൃശ്യങ്ങൾ പരിശോധിച്ചാണ് പ്രതികളെ അറസ്റ്റ് ചെയ്തത്. ഇവരെ ചോദ്യം ചെയ്തതിലൂടെ ഡോക്ടർമാർ ഉൾപ്പെട്ട ഫരീദാബാദിലെ ഭീകരസംഘത്തെക്കുറിച്ച് പോലീസിന് സൂചന ലഭിച്ചതായാണ് റിപ്പോർട്ടുകൾ. ഡൽഹി ചെങ്കോട്ട കാർ സ്ഫോടനവുമായി ഈ മൊഡ്യൂളിലെ ഒരംഗത്തിന് ബന്ധമുണ്ടെന്നും റിപ്പോർട്ടുകളുണ്ട്. അട്ടിമറി അടക്കം എല്ലാ സാധ്യതയും ഏജൻസികൾ അന്വേഷിക്കുന്നുണ്ട്.
