ഇന്ത്യൻ പ്രീമിയർ ലീഗിന്റെ (ഐപിഎൽ) അടുത്ത സീസണിനായുള്ള താര കൈമാറ്റം (സ്വാപ് ഡീൽ) പൂർത്തിയായി. മലയാളി താരം സഞ്ജു സാംസൺ രാജസ്ഥാൻ റോയൽസ് (RR) വിട്ട് ചെന്നൈ സൂപ്പർ കിംഗ്‌സിന്റെ (CSK) മഞ്ഞ ജേഴ്‌സിയണിയും. പകരം ചെന്നൈയുടെ വിശ്വസ്ത ഓൾറൗണ്ടർ രവീന്ദ്ര ജഡേജ തന്റെ പഴയ തട്ടകമായ രാജസ്ഥാൻ റോയൽസിലേക്ക് മടങ്ങിയെത്തും. ഐപിഎൽ (IPL) ചരിത്രത്തിലെ തന്നെ ഏറ്റവും ശ്രദ്ധേയമായ സ്വാപ് ഡീലുകളിൽ ഒന്നാണ് ഇതോടെ യാഥാർത്ഥ്യമായത്.
ഐപിഎല്ലിൽ 2013-ൽ അരങ്ങേറ്റം കുറിച്ച ശേഷം അധികവും രാജസ്ഥാൻ റോയൽസിനൊപ്പമായിരുന്നു ക്രിക്കറ്റിൽ മലയാളി ആവേശമായ സഞ്ജു. രാജസ്ഥാൻ റോയൽസിന്റെ ക്യാപ്റ്റനായിരുന്ന സഞ്ജു 2022-ൽ ടീമിനെ ഫൈനലിൽ എത്തിച്ചു. റോയൽസുമായുള്ള ആ ദീർഘകാല ബന്ധം അവസാനിപ്പിച്ചാണ് നിലവിലെ പ്രതിഫലമായ 18 കോടിക്ക് സഞ്ജു ചെന്നൈ സൂപ്പർ കിംഗ്‌സിലേക്ക് എത്തുന്നത്.
‘സർ’ എന്ന് ആരാധകർ വിളിക്കുന്ന രവീന്ദ്ര ജഡേജ, 12 സീസണുകളോളം ചെന്നൈയുടെ അവിഭാജ്യ ഘടകമായിരുന്നു. സ്വാപ് ഡീലിനെ തുടർന്ന് ജഡേജയുടെ പ്രതിഫലം 18 കോടിയിൽ നിന്ന് 14 കോടി രൂപയായി കുറഞ്ഞിട്ടുണ്ട്. ഐപിഎല്ലിൽ ജഡേജ തന്റെ കരിയറിന് തുടക്കം കുറിച്ചത് രാജസ്ഥാൻ റോയൽസിലാണ്. രാജസ്ഥാൻ റോയൽസിന് വേണ്ടി ജഡേജ വീണ്ടും പന്തെറിയുന്നത് കാണാൻ ആരാധകർ കാത്തിരിക്കുകയാണ്.
ഈ മെഗാ താര കൈമാറ്റത്തിൽ കൂടുമാറിയ മറ്റു കളിക്കാരുമുണ്ട്. ചെന്നൈ സൂപ്പർ കിംഗ്‌സിൽ നിന്ന് ഇംഗ്ലീഷ് ഓൾറൗണ്ടർ സാം കറൺ രാജസ്ഥാൻ റോയൽസിലെത്തി. ഫാസ്റ്റ് ബൗളർ മുഹമ്മദ് ഷമി സൺറൈസേഴ്‌സ് ഹൈദരാബാദിൽ (SRH) നിന്ന് ലഖ്‌നൗ സൂപ്പർ ജയന്റ്‌സിലേക്ക് (LSJ) ചേക്കേറി. അർജുൻ ടെണ്ടുൽക്കറും മുംബൈ ഇന്ത്യൻസിൽ നിന്നും ലഖ്‌നൗവിലേക്കാണ് മാറിയത്. മുംബൈ ഇന്ത്യൻസ് ലെഗ് സ്പിന്നർ മായങ്ക് മർക്കണ്ഡെയെ തിരികെ കൊണ്ടുവന്നപ്പോൾ, നിതീഷ് റാണ രാജസ്ഥാൻ റോയൽസിൽ നിന്ന് ഡൽഹി ക്യാപിറ്റൽസിലേക്ക് (DC) ട്രേഡ് ചെയ്യപ്പെട്ടു.
