ഗോവയിലെ നിശാ ക്ലബ്ബിലുണ്ടായ തീപിടിത്തവുമായി ബന്ധപ്പെട്ട് ക്ലബ്ബ് ഉടമകളായ സൗരഭ് ലുത്ര, ഗൗരവ് ലുത്ര എന്നിവരെ തായ്ലൻഡിൽ നിന്ന് അറസ്റ്റ് ചെയ്തു. 25 പേരുടെ മരണത്തിനിടയാക്കിയ സംഭവത്തിൽ അന്വേഷണം നേരിടുന്ന ഇവരെ വിചാരണയ്ക്കായി ഇന്ത്യയിലേക്ക് തിരിച്ചയക്കാനുള്ള നടപടികൾ ആരംഭിച്ചു.
കൈകൾ ബന്ധിച്ച നിലയിൽ പാസ്പോർട്ടും പിടിച്ച് തായ് പോലീസിനൊപ്പം നിൽക്കുന്ന ഇവരുടെ ചിത്രങ്ങൾ പുറത്തുവന്നിട്ടുണ്ട്. മനഃപൂർവ്വമല്ലാത്ത നരഹത്യ, അശ്രദ്ധ തുടങ്ങിയ കുറ്റങ്ങളാണ് ഇവർക്കെതിരെ ചുമത്തിയിരിക്കുന്നത്. നോർത്ത് ഗോവയിലെ അർപോറ വില്ലേജിലുള്ള ‘ബിർച്ച് ബൈ റോമിയോ ലൈൻ’ എന്ന നിശാ ക്ലബ്ബിൽ ശനിയാഴ്ച രാത്രി വൈകിയാണ് അപകടമുണ്ടായത്. ഏകദേശം നൂറോളം പേർ പങ്കെടുത്ത സംഗീത പരിപാടിക്കിടെ, ബോളിവുഡ് ഗാനങ്ങൾക്കൊപ്പം നൃത്തം ചെയ്യുമ്പോൾ ഉപയോഗിച്ച ഇലക്ട്രിക് പടക്കങ്ങളിൽ നിന്നാണ് തീ പടർന്നതെന്നാണ് പ്രാഥമിക നിഗമനം.
എളുപ്പത്തിൽ തീപിടിക്കുന്ന അലങ്കാരവസ്തുക്കളും, പ്രവർത്തനരഹിതമായ അഗ്നിശമന സംവിധാനങ്ങളും, അപായ സൈറണുകളുടെ അഭാവവും ദുരന്തത്തിന്റെ ആഴം വർധിപ്പിച്ചു. കൂടാതെ, ഗേറ്റ് ഇടുങ്ങിയതായത് കാരണം അഗ്നിശമന സേനയ്ക്ക് 400 മീറ്റർ അകലെ വാഹനം നിറുത്തിയിടേണ്ടി വന്നതും രക്ഷാപ്രവർത്തനത്തെ ബാധിച്ചു. അഞ്ച് വിനോദസഞ്ചാരികളും 20 ജീവനക്കാരുമടക്കം 25 പേരാണ് അപകടത്തിൽ മരിച്ചത്. ബേസ്മെന്റിലുണ്ടായ വിഷപ്പുക ശ്വസിച്ചതാണ് ഭൂരിഭാഗം പേരുടെയും മരണത്തിന് കാരണമായത്.
തീപിടിത്തമുണ്ടായി മണിക്കൂറുകൾക്കകം തന്നെ ലുത്ര സഹോദരങ്ങൾ തായ്ലൻഡിലെ ഫുക്കറ്റിലേക്ക് കടന്നിരുന്നു. ഡൽഹിയിലെ ഇവരുടെ വീടുകളിൽ പോലീസ് റെയ്ഡ് നടത്തുന്നതിന് മുമ്പേ ഇവർ രാജ്യം വിട്ടിരുന്നു. ഇവരുടെ ബിസിനസ് പങ്കാളിയായ അജയ് ഗുപ്തയെ നേരത്തെ ഡൽഹിയിൽ നിന്ന് അറസ്റ്റ് ചെയ്തിരുന്നു.
തങ്ങൾ കെട്ടിടത്തിന്റെ ലൈസൻസികൾ മാത്രമാണെന്നും ഉടമകളല്ലെന്നും കാണിച്ച് ലുത്ര സഹോദരങ്ങൾ ഡൽഹി കോടതിയിൽ മുൻകൂർ ജാമ്യത്തിന് ശ്രമിച്ചിരുന്നു. ബിസിനസ് ആവശ്യങ്ങൾക്കായി വിദേശത്തായിരുന്നെന്നും അന്വേഷണത്തിൽ നിന്ന് ഒളിച്ചോടിയതല്ലെന്നുമാണ് ഇവരുടെ വാദം.
