ദുബായ് എയർ ഷോയിൽ വ്യോമാഭ്യാസ പ്രകടനത്തിനിടെ ഇന്ത്യൻ വ്യോമസേനയുടെ (ഐ.എ.എഫ്) തദ്ദേശീയമായി നിർമ്മിച്ച ‘തേജസ്’ യുദ്ധവിമാനം തകർന്നു വീണു. അപകടത്തിൽ വിമാനത്തിന്റെ പൈലറ്റ് ദാരുണമായി മരണപ്പെട്ടു എന്ന് ഇന്ത്യൻ വ്യോമസേന സ്ഥിരീകരിച്ചു.
ഇന്ന് പ്രാദേശിക സമയം ഉച്ചയ്ക്ക് 2:10 ഓടെയാണ് സംഭവം. അൽ മക്തൂം അന്താരാഷ്ട്ര വിമാനത്താവളത്തിൽ നടന്ന എയർ ഷോയുടെ ഭാഗമായി പ്രകടനം നടത്തുന്നതിനിടെയാണ് വിമാനം നിയന്ത്രണം വിട്ട് നിലത്തേക്ക് പതിച്ചത്. തകർന്ന വിമാനത്തിൽ നിന്ന് കറുത്ത പുക ഉയരുന്നത് കാണികൾക്കിടയിൽ പരിഭ്രാന്തി പരത്തി.
വ്യോമസേനയുടെ പ്രതികരണം
“ദുബായ് എയർ ഷോയിലെ വ്യോമാഭ്യാസ പ്രകടനത്തിനിടെ ഒരു ഐ.എ.എഫ്. തേജസ് വിമാനം അപകടത്തിൽപ്പെട്ടു. പരിക്കേറ്റ പൈലറ്റ് മരണപ്പെട്ടു. ഇതിൽ വ്യോമസേന അഗാധമായി ഖേദിക്കുന്നു, കുടുംബത്തോടൊപ്പം ഉറച്ചുനിൽക്കുന്നു, അവരുടെ ദുഃഖത്തിൽ പങ്കു ചേരുന്നു” ഐ.എ.എഫ്. പ്രസ്താവനയിൽ അറിയിച്ചു.
അപകടത്തിന്റെ കാരണം കണ്ടെത്താനായി ഒരു കോർട്ട് ഓഫ് ഇൻക്വയറിക്ക് രൂപം നൽകിയിട്ടുണ്ട് എന്നും വ്യോമസേന വ്യക്തമാക്കി.
ഇന്ത്യയുടെ പ്രതിരോധശേഷി ആഗോളതലത്തിൽ പ്രദർശിപ്പിക്കാൻ വേണ്ടിയാണ് ലൈറ്റ് കോംബാറ്റ് എയർക്രാഫ്റ്റ് (എൽ.സി.എ) വിഭാഗത്തിൽപ്പെടുന്ന തേജസ് വിമാനം ദുബായ് എയർ ഷോയിൽ പങ്കെടുത്തത്.
