എക്സിറ്റ് പോൾ പ്രവചനങ്ങളെ ബഹുദൂരം മറികടന്ന വൻ വിജയുമായി ബിഹാറിൽ എൻഡിഎ (National Democratic Alliance). ബിജെപിയും നിതീഷ് കുമാറിന്റെ ജെഡിയുവും (Janata Dal United) നയിക്കുന്ന എൻഡിഎ സഖ്യം ഇതോടെ ഭരണ തുടർച്ച നേടി. നിലവിനെ സീറ്റ് നില എൻഡിഎ 201, മഹാസഖ്യം (Mahagathbandhan) 35 മറ്റു പാർട്ടികൾ ഏഴ് എന്നിങ്ങനെയാണ്. തിരഞ്ഞെടുപ്പ് തന്ത്രജ്ഞനായി രാഷ്ട്രീയത്തിലെത്തിയ പ്രശാന്ത് കിഷോറിന്റെ ജൻ സുരാജ് പാർട്ടിക്ക് (ജെഎസ് പി) നിലം തൊടാൻ കഴിഞ്ഞില്ല.
ബിജെപി 94, ജെഡിയു 83, LJP (Lok Janshakti Party) 20,എച്ച്എഎം (Hindustani Awam Morcha) അഞ്ച്, ആർഎൽഎം (Rashtriya Lok Morcha) നാല് എന്നിങ്ങനെയാണ് എൻഡിഎ യിലെ പാർട്ടികളുടെ സീറ്റ് നില. മഹാസഖ്യത്തിൽ ആർജെഡി 25 ലും കോൺഗ്രസ് അഞ്ചിലും സിപിഐ (എംഎൽ) ഒരു സീറ്റിലും ലീഡ് ചെയ്യുന്നു. ഇതോടെ അപ്രാപ്യമെന്ന് കരുതിയ 200 സീറ്റിന് മുകളിലുള്ള ഭൂരിപക്ഷമാണ് ഭരണ സഖ്യമായ എൻഡിഎ നേടിയത്.
തേജസ്വി യാദവ് നയിക്കുന്ന ആർജെഡിയും (Rashrtiya Janata Dal) കോൺഗ്രസും ഉൾപ്പെട്ട മഹാസഖ്യം പ്രതീക്ഷിച്ച വിജയത്തിന് അടുത്തെങ്ങുമെത്തിയില്ല. ശക്തിദുര്‍ഗങ്ങള്‍ പലതും മഹാസഖ്യത്തിന് നഷ്ടമായി. കോണ്‍ഗ്രസിന് അഞ്ച് സീറ്റിൽ ഒതുങ്ങേണ്ടി വന്നു. ബിജെപി ആസ്ഥാനത്ത് വൻ ആഘോഷമാണ് നടക്കുന്നത്. വൈകിട്ട് പ്രധാനമന്ത്രി നരേന്ദ്ര മോദി പാർട്ടി പ്രവർത്തകരെ അഭിസംബോധന ചെയ്യും.
എല്ലാ മേഖലകളിലും വോട്ട് വിഹിതം ഉയർത്തിയാണ് ബീഹാറിൽ നീതീഷ് – മോദി സഖ്യം ആധികാരിക വിജയം നേടിയത്. അതേസമയം തിരഞ്ഞെടുപ്പ് കമ്മീഷനെ കുറ്റപ്പെടുത്തി കോൺഗ്രസ് നേതാക്കൾ രംഗത്തെത്തി. തിരഞ്ഞെടുപ്പിന് തൊട്ടുമുൻപ് എൻഡിഎ പണം വിതരണം ചെയ്‌തൂവെന്നും തിരഞ്ഞെടുപ്പ് കമ്മീഷന്റെ മൗനവുമാണ് ഫലത്തെ സ്വാധീനിച്ചതെന്ന് അശോക് ഗെലോട്ട് ആരോപിച്ചു.
