ഇന്ത്യയിലെ വോട്ടർ പട്ടിക പ്രത്യേക തീവ്ര പുനഃപരിശോധന (Special Intensive Revision – SIR) രാജ്യത്തുടനീളം അതുമായി ബന്ധപ്പെട്ട ജീവനക്കാരെ പ്രതിസന്ധിയിലേക്ക് തള്ളി വിടുകയാണ്. ‘മനുഷ്യത്വ രഹിതമായ ജോലിഭാരം’ താങ്ങാനാവാതെ കുറഞ്ഞത് അഞ്ച് ബൂത്ത് ലെവൽ ഓഫീസർമാർ (BLOs) ആത്മഹത്യ ചെയ്തു. ജോലി ഭാരമാണ് മരണകാരണമെന്ന് പലരുടെയും കുടുംബാംഗങ്ങളും സഹപ്രവർത്തകരും സാക്ഷ്യപ്പെടുത്തുന്നു.
മരിച്ച ബിഎൽഒ മാരിൽ ചിലർ എഴുതിയ ആത്മഹത്യാക്കുറിപ്പുകൾ ഈ പ്രതിസന്ധിയുടെ ആഴം വ്യക്തമാക്കുന്നവയാണ്. പശ്ചിമ ബംഗാളിലെ കൃഷ്ണനഗറിൽ നിന്നുള്ള റിങ്കു തറഫ്ദാർ എന്ന 53-കാരിയായ അധ്യാപിക നവംബർ 22-നാണ് ജീവനൊടുക്കിയത്. തെരഞ്ഞെടുപ്പ് കമ്മീഷനാണ് തൻ്റെ മരണത്തിന് ഉത്തരവാദിയെന്ന് അവരുടെ ആത്മഹത്യാക്കുറിപ്പിൽ പറയുന്നു- “മനുഷ്യത്വ രഹിതമായ ജോലിഭാരം എനിക്ക് താങ്ങാൻ കഴിയില്ല. ഓഫ് ലൈൻ ജോലി 95 ശതമാനവും പൂർത്തിയാക്കി. എന്നാൽ ഓൺലൈൻ കാര്യങ്ങൾ എനിക്കറിയില്ല. എല്ലാ കാര്യങ്ങളും കൃത്യസമയത്ത് ചെയ്തു തീർക്കണം ഒന്നിനും സാവകാശമില്ല,” ഇതെനിക്ക് സഹിക്കാൻ പറ്റുന്നില്ല.”
രാജസ്ഥാനിൽ ആത്മഹത്യ ചെയ്ത മുകേഷ് ജാംഗിഡ്ഡിന്റെ ആത്മഹത്യക്കുറിപ്പിൽ, സൂപ്പർവൈസറിൽ നിന്നുള്ള “അതികഠിനമായ ജോലി സമ്മർദ്ദത്തെക്കുറിച്ചും സസ്പെൻഷൻ ഭീഷണിയെക്കുറിച്ചും” പറയുന്നുണ്ട്. ഇവരെ കൂടാതെ ഹൃദയാഘാതം, അമിതമായ ജോലിഭാരം മൂലമുള്ള സമ്മർദ്ദം എന്നിവ കാരണം 11-ഓളം ബി.എൽ.ഒമാർ മരിച്ചതായും അവരുടെ കുടുംബങ്ങൾ ആരോപിക്കുന്നു.
സാധാരണയായി നടക്കുന്ന വാർഷിക വോട്ടർ പട്ടിക പുതുക്കലിൽ നിന്ന് വ്യത്യസ്തമായി, എസ്ഐആർ പ്രക്രിയയിൽ ബിഎൽഒ മാർക്ക് അസാധ്യമായ ജോലികളാണ് എസ്‌ഐആറിൽ പൂർത്തിയാക്കേണ്ടി വരുന്നത്. ഓരോ വീട്ടിലും പോയി വിശദമായ ഫോമുകൾ വിതരണം ചെയ്യുകയും വിവരങ്ങൾ ശേഖരിക്കുകയും പരിശോധിക്കുകയും വേണം. ഏറ്റവും ബുദ്ധിമുട്ടുള്ള കാര്യം, 2002-ലേയും 2003-ലേയും വോട്ടർ പട്ടികയുമായി നിലവിലെ വിവരങ്ങൾ ഒത്തുനോക്കേണ്ടതുണ്ട് എന്നതാണ്. രണ്ട് പതിറ്റാണ്ടിലേറെ പഴക്കമുള്ള വിവരങ്ങൾ ശേഖരിക്കാൻ വോട്ടർമാർക്ക് പോലും കഴിയുന്നില്ല.
ലഭിച്ച ഓരോ ഫോമും ദേശീയ മൊബൈൽ ആപ്ലിക്കേഷൻ ഉപയോഗിച്ച് ഡിജിറ്റൈസ് ചെയ്യണം. ഈ ആപ്ലിക്കേഷൻ നിരവധി ബിഎൽഒമാർ ഒരുമിച്ച് ഉപയോഗിക്കാൻ ശ്രമിക്കുമ്പോൾ പലപ്പോഴും ക്രാഷ് ആകുന്നു എന്നും തകരാറിലാകുന്നു എന്നും ഉദ്യോഗസ്ഥർ പറയുന്നു.
കൃത്യമായ സമയപരിധിക്കുള്ളിൽ നിശ്ചിത എണ്ണം ഫോമുകൾ പൂർത്തിയാക്കാനുള്ള ലക്ഷ്യം കൈവരിക്കാൻ കഴിയാത്തതാണ് ബിഎൽഒ മാരെ തളർത്തുന്നത്. ഉദ്യോഗസ്ഥർ ഓരോ മണിക്കൂറിലും ജോലി പുരോഗതി നിരീക്ഷിച്ച് നൽകുന്ന നിർദ്ദേശങ്ങളും ഇവർ അനുസരിക്കണം. ഉത്തർപ്രദേശിലെ ബസ്തിയിൽ, എസ്ഐ ആർ പ്രക്രിയയിൽ സഹകരിച്ചില്ലെന്ന് ആരോപിച്ച് ഒരു മേലുദ്യോഗസ്‌ഥൻ ഒരു ബിഎൽഒ യെ പരസ്യമായി ശകാരിക്കുകയും എഫ്ഐആർ രജിസ്റ്റർ ചെയ്യാൻ ഉത്തരവിടുകയും ചെയ്യുന്നതിൻ്റെ വീഡിയോ സമൂഹ മാധ്യമങ്ങളിൽ പ്രചരിക്കുന്നുണ്ട്.
ഉത്തർപ്രദേശിലെ നോയിഡയിൽ, എസ്ഐആർ ഡ്യൂട്ടിയിൽ അശ്രദ്ധ കാണിച്ചെന്നാരോപിച്ച് 60-ൽ അധികം ബിഎൽഒ മാർക്കെതിരെയും ഏഴ് സൂപ്പർവൈസർമാർക്കെതിരെയും കേസുകൾ (FIR) രജിസ്റ്റർ ചെയ്തിട്ടുണ്ട്. എസ്ഐആർ പ്രക്രിയക്കെതിരെ വിവിധ രാഷ്ട്രീയ നേതാക്കളും സംഘടനകളും രംഗത്തെത്തിയിട്ടുണ്ട്.
