റഷ്യൻ പ്രസിഡന്റ് വ്ളാഡിമിർ പുടിന് രാഷ്ട്രപതി ഭവനിൽ നൽകിയ ഔദ്യോഗിക അത്താഴ വിരുന്നിൽ ശശി തരൂർ എം പി പങ്കെടുത്തതിനെച്ചൊല്ലിയുള്ള കോൺഗ്രസിന്റെ വിവാദങ്ങളിൽ അദ്ഭുതം പ്രകടിപ്പിച്ച് ബിജെപി എംപി മനോജ് തിവാരി. സ്വന്തം പാർട്ടിയിലെ എംപിക്ക് ലഭിച്ച അംഗീകാരത്തിൽ കോൺഗ്രസ് എന്തിനാണ് അസ്വസ്ഥരാകുന്നതെന്ന് തനിക്ക് മനസ്സിലാകുന്നില്ലെന്ന് തിവാരി പറഞ്ഞു.
“ശശി തരൂർ ഒരു കോൺഗ്രസ് എംപിയാണ്. അദ്ദേഹത്തിന് വിരുന്നിലേക്ക് ക്ഷണം ലഭിക്കുകയും അദ്ദേഹം അത് സ്വീകരിച്ച് പങ്കെടുക്കുകയും ചെയ്തു. ഇതിൽ കോൺഗ്രസിന് എന്താണ് പ്രശ്നമെന്ന് എനിക്ക് മനസ്സിലാകുന്നില്ല. അവരുടെ ഈ മനോഭാവം വിചിത്രമാണ്,” മനോജ് തിവാരി അഭിപ്രായപ്പെട്ടു.
പുടിന് നൽകിയ വിരുന്നിൽ ലോക്സഭാ പ്രതിപക്ഷ നേതാവ് രാഹുൽ ഗാന്ധിയെയും രാജ്യസഭാ പ്രതിപക്ഷ നേതാവ് മല്ലികാർജുൻ ഖാർഗെയെയും കേന്ദ്ര സർക്കാർ ക്ഷണിച്ചിരുന്നില്ല. ഇതിൽ കോൺഗ്രസ് നേതൃത്വം കടുത്ത പ്രതിഷേധം രേഖപ്പെടുത്തിയിരുന്നു. ഇതിനിടെയാണ് പാർലമെന്ററി വിദേശകാര്യ സമിതി അധ്യക്ഷൻ എന്ന നിലയിൽ ശശി തരൂർ വിരുന്നിൽ പങ്കെടുത്തത്.
തരൂർ പങ്കെടുത്തതിനെതിരെ കോൺഗ്രസ് വക്താവ് പവൻ ഖേര പരോക്ഷ വിമർശനം ഉന്നയിച്ചിരുന്നു. “ക്ഷണം ലഭിക്കുമ്പോൾ സ്വന്തം മനസാക്ഷിയോട് ചോദിക്കണമായിരുന്നു” എന്നായിരുന്നു ഖേരയുടെ പരാമർശം. എന്നാൽ, വിദേശകാര്യ സമിതി അധ്യക്ഷനെന്ന നിലയിലുള്ള ഉത്തരവാദിത്തമാണ് താൻ നിർവഹിച്ചതെന്നാണ് തരൂരിന്റെ നിലപാട്.
രാജ്യത്തിന്റെ നയതന്ത്ര പ്രാധാന്യമുള്ള ചടങ്ങുകളെപ്പോലും കോൺഗ്രസ് രാഷ്ട്രീയവത്കരിക്കുകയാണെന്ന് ബിജെപി ആരോപിച്ചു.
