പ്രശസ്ത അസം ഗായകൻ സുബീൻ ഗാർഗിന്റെ മരണം കൊലപാതകമാണെന്ന് അസം മുഖ്യമന്ത്രി ഹിമന്ത ബിശ്വ ശർമ്മ നിയമസഭയിൽ. ഒരാളാണ് സുബീനെ കൊന്നതെന്നും മറ്റുള്ളവർ സഹായം നൽകിയെന്നും ശർമ്മ സഭയെ അറിയിച്ചു.
ചൊവ്വാഴ്ച നിയമസഭയുടെ ശീതകാല സമ്മേളനത്തിന്റെ ആദ്യ ദിവസം നടന്ന ചർച്ചക്കിടെയാണ് മുഖ്യമന്ത്രിയുടെ ഈ നിർണായക വെളിപ്പെടുത്തൽ. സെപ്തംബർ 19-ന് സിംഗപ്പൂരിൽ കടലിൽ നീന്തുന്നതിനിടെയാണ് 52-കാരനായ സുബീൻ ഗാർഗ് മരണപ്പെട്ടത്.
പ്രാഥമിക അന്വേഷണത്തിന് ശേഷം അസം പോലീസ് ഇത് മനഃപൂർവമല്ലാത്ത നരഹത്യയല്ല, ആസൂത്രിതമായ കൊലപാതകമാണെന്ന് ഉറപ്പിച്ചു. അതുകൊണ്ടാണ് മരണപ്പെട്ട് മൂന്ന് ദിവസത്തിനകം കേസിൽ ബിഎൻഎസിലെ (ഭാരതീയ ന്യായ സംഹിത) 103-ാം വകുപ്പ് കൂടി ചേർത്തതെന്ന് മുഖ്യമന്ത്രി കൂട്ടിച്ചേർത്തു.
സംസ്ഥാന പോലീസ് സിഐഡിയുടെ നേതൃത്വത്തിലുള്ള പ്രത്യേക അന്വേഷണ സംഘം (SIT) ഇതുവരെ ഏഴ് പേരെ അറസ്റ്റ് ചെയ്യുകയും 252 സാക്ഷികളെ ചോദ്യം ചെയ്യുകയും ചെയ്തിട്ടുണ്ട്. ഒരാൾ ഗാർഗിനെ കൊലപ്പെടുത്തുകയും നാലോ അഞ്ചോ പേർ സഹായിക്കുകയും ചെയ്തതായി കരുതുന്നു.
കൊലപാതകത്തിന് പിന്നിലെ കാരണം ജനങ്ങളെ ഞെട്ടിക്കുമെന്നും ഡിസംബറിൽ കുറ്റപത്രം സമർപ്പിച്ച ശേഷം മറ്റ് വശങ്ങൾ കൂടി അന്വേഷണത്തിന്റെ പരിധിയിൽ വരുമെന്നും മുഖ്യമന്ത്രി പറഞ്ഞു.
സുബീൻ ഗാർഗിൻ്റെ മരണവുമായി ബന്ധപ്പെട്ട സാഹചര്യങ്ങൾ ചർച്ച ചെയ്യാൻ പ്രതിപക്ഷം അടിയന്തിര പ്രമേയം അവതരിപ്പിച്ചതിനെ തുടർന്നായിരുന്നു മുഖ്യമന്ത്രിയുടെ പ്രതികരണം.
സുബീൻ ഗാർഗിൻ്റെ മരണത്തെക്കുറിച്ച് അന്വേഷിക്കാൻ ഗുവാഹത്തി ഹൈക്കോടതിയിലെ ജസ്റ്റിസ് സൗമിത്ര സൈകിയയുടെ നേതൃത്വത്തിലുള്ള ഏകാംഗ കമ്മീഷനും രൂപീകരിച്ചിട്ടുണ്ട്. ഈ കമ്മീഷൻ മൊഴികൾ രേഖപ്പെടുത്തുന്നതിനും തെളിവുകൾ സമർപ്പിക്കുന്നതിനുമുള്ള സമയപരിധി ഡിസംബർ 12 വരെ നീട്ടി നൽകിയിട്ടുണ്ട്.
